កុមារាម្នាក់ត្រូវឪពុកវាយចាប់ដាក់ច្រវាក់ដោយសារខឹងរឿងលេងហ្គេម
កុមារាម្នាក់ត្រូវឪពុកចរិតដ៏ឃោរឃៅបំផុត វាយធ្វើបាបហើយបានយកច្រវាក់ដាក់.ករួចអូសយកទៅចាក់សោភ្ជាប់ទៅនឹងបង្គោលភ្លើងក្បែរចិញ្ចើមផ្លូវ សាធារណៈឱ្យមហាជនមើល ដោយសារតែខឹងហាមមិនស្តាប់រឿងទៅលេងហ្គេម។
ហេតុការណ៍នេះបានកើតឡើងនៅម៉ោងប្រហែល៤រសៀល ថ្ងៃទី២៧ មីនា ២០១២ នៅភូមិចំការឫស្សី សង្កាត់ព្រែកព្រះស្តេច ក្រុងបាត់ដំបង។ កុមារារងគ្រោះមានឈ្មោះ សុខ ខន អាយុ១៣ឆ្នាំ ឪពុកឈ្មោះសុខ ធឿន អាយុជាង៤០ឆ្នាំ និងម្តាយឈ្មោះលី។
ក្រោយពីមានហេតុការណ៍នេះកើតឡើងភ្លាម អ្នកភូមិបានរាយការណ៍ទៅលោកស្នងការរងនគរបាលខេត្ត ជេត វណ្ណនី ទើបលោកបញ្ជាឱ្យកម្លាំងចុះអន្តរាគមន៍ភ្លាមៗ។ នៅពេលសមត្ថកិច្ចចុះទៅដល់ គេឃើញកុមារានោះកំពុងជាប់ច្រវាក់.កដែលចាក់ដោយសោសូឡិច រីឯសោមួយទៀតត្រូវឪពុកចាក់ច្រវាក់ភ្ជាប់ទៅនឹងបង្គោលភ្លើង។ បន្ទាប់មកក៍បានសង្គ្រោះកុមារានោះចេញពីច្រវាក់ ប៉ុន្តែឪពុកក្មេងនេះបានគេចខ្លួនបានទៅហើយមុនពេលសមត្ថកិច្ចចុះទៅដល់។
កុមារារងគ្រោះបាននិយាយទាំងទឹកភ្នែកថា ឪពុកខ្លួនខឹងដោយសារខ្លួនទៅលេងហ្គេម ។ ពេលកំពុងលេងបានប្រហែលជិតកន្លះម៉ោងឪពុកខ្លួនបានទៅ តាមរួចនាំមកដល់ផ្ទះក៏វាយធ្វើទារុណកម្មមកលើខ្លួន ហើយយកច្រវាក់មកទាក់.កចាក់សោយ៉ាងតឹង រួចអូសខ្លួនទៅចាក់សោមួយទៀតភ្ជាប់នឹងបង្គោលភ្លើងក្បែរផ្លូវកណ្តាលវាល ហើយគាត់ជិះម៉ូតូគេចបាត់ លុះមួយន្ទុះទើបមានប៉ូលិសចុះមកជួយ៕
