លោក ហោ ណាំហុង៖ ភាគីថៃនឹងដកទ័ពចេញពី ទឹកដីនៅជិតប្រាសាទព្រះវិហារនាពេលឆាប់ៗនេះ
Cambodia News
ភ្នំពេញ៖ កាលពីល្ងាចថ្ងៃទី៩ មេសា ២០១៣ លោកឧបនាយករដ្ឋមន្ត្រី ហោ ណាំហុង បានប្រាប់ ក្រុមអ្នកសារព័ត៌មាន មុនពេលលោកដឹកនាំគណៈ ប្រតិភូទៅទីក្រុងឡាអេ ថា កម្ពុជានឹងឈ្នះលើការ បកស្រាយ សាលក្រម របស់តុលាការ យុត្តិធម៌អន្តរជាតិ (ICJ) ហើយភាគីថៃនឹងដកទ័ពចេញពី ទឹកដីនៅជិតប្រាសាទ ព្រះវិហារឲ្យអស់ នាពេលឆាប់ៗនេះ។
ជាមួយគ្នានេះដែរ ចំពោះការតតាំង ក្តីផ្ទាល់មាត់ជាមួយ ប្រទេសថៃនេះ លោក ហោ ណាំហុង បានបញ្ជាក់ថា ភាគីកម្ពុជាក៏មាន មេធាវីការពារក្តី ជាជនជាតិបរទេសចំនួន៣ នាក់ដូច ប្រទេសថៃផងដែរ។
ការបកស្រាយសាល ក្រមផ្ទាល់មាត់នៅទីក្រុងឡាអេនេះ ក៏មានការចាកផ្សាយផ្ទាល់ តាមរយៈគេហទំព័រ តុលាការយុត្តិធម៌អន្តរជាតិទីក្រុងឡាអេ www.icj-cij.org ស្ថិតនៅខាងក្រោមមាតិកា ព័ត៌មាន ជាវីដេអូ សរសេរថា «Multimedia» ឬក៏ចូលទៅកាន់គេហទំព័រ http://webtv.un.org/។
គួរបញ្ជាក់ថា ការបកស្រាយសាលក្រមផ្ទាល់មាត់នេះ នឹងធ្វើឡើងចំនួន២ជុំ ដោយជុំទី១ តម្រូវ ឲ្យភាគីកម្ពុជាបកស្រាយនៅថ្ងៃទី ១៥ ខែមេសា រីឯថៃវិញបកស្រាយនៅថ្ងៃទី១៧ ខែមេសា ហើយដោយឡែកជុំទី២វិញ កម្ពុជាបកស្រាយនៅថ្ងៃទី១៨ ហើយភាគថៃ នៅថ្ងៃទី១៩ ខែមេសា៕
