ប្រតិភូខ្មែរ ចេញទៅកាន់ ទីក្រុងឡាអេ ដើម្បីតតាំងក្តីរឿងប្រាសាទ ព្រះវិហារ
Cambodia News
ភ្នំពេញ៖ នៅល្ងាចថ្ងៃអង្គារ ទី០៩ ខែ មេសា ឆ្នាំ២០១៣នេះ ឧបនាយករដ្ឋមន្រ្តី រដ្ឋមន្រ្តីក្រសួងការបរទេសកម្ពុជា លោក ហោ ណាំហុង នឹងដឹកនាំគណៈប្រតិភូ កម្ពុជាទៅកាន់តុលាការ យុត្តិធម៌អន្តរជាតិ (ICJ) ទីក្រុងឡាអេ ប្រ ទេសហូឡង់ ដើម្បីចូលរួមសវនាការបកស្រាយសាលក្រមផ្ទាល់មាត់ ចាប់ពីថ្ងៃទី១៥ ដល់ថ្ងៃទី១៩ ខែមេសា ឆ្នាំ២០១៣ ស្តីពីទំនាស់ជុំវិញប្រាសាទព្រះវិហាររបស់ ខ្មែរជាមួយប្រទេសថៃ។
ចំពោះការតតាំងក្តីផ្ទាល់មាត់ជាមួយប្រទេសថៃនេះ ភាគីកម្ពុជាក៏មានមេធាវីការពារក្តីជាជនជាតិបរទេសចំនួន៣ នាក់ដូចប្រទេសថៃផងដែរ។ ការបកស្រាយសាល ក្រមផ្ទាល់មាត់នៅទីក្រុងឡាអេនេះ ក៏មានការចាកផ្សាយផ្ទាល់ តាមរយៈគេហទំព័តុលាការយុត្តិធម៌អន្តរជាតិទីក្រុងឡាអេ www.icj-cij.org ស្ថិតនៅខាងក្រោមមាតិកា ព័ត៌មាន ជាវីដេអូ សរសេរថា «Multimedia» ឬក៏ចូលទៅកាន់គេហទំព័រ http://webtv.un.org/។
ការបកស្រាយសាលក្រមផ្ទាល់មាត់នេះ នឹងធ្វើឡើងចំនួន២ជុំ ដោយជុំទី១ ត្រមូវឲ្យភាគីកម្ពុជាបកស្រាយនៅថ្ងៃទី ១៥ ខែមេសា រីឯថៃវិញបកស្រាយនៅថ្ងៃទី១៧ ខែមេសា។ ដោយឡែកជុំទី២វិញ កម្ពុជាបកស្រាយនៅថ្ងៃទី១៨ ហើយភាគថៃ នៅថ្ងៃទី១៩ ខែមេសា៕
