ព្រះរាជអាជ្ញា សម្រេចចោទភរិយា ឧកញ៉ា វ៉េង លីតិចឡា ពីបទធ្វើទារុណកម្មទៅលើកូនឈ្នួលរបស់ខ្លួន ២នាក់
Cambodia News
ភ្នំពេញ ៖ អ្នកស្រី លី ពៅ ភរិយា ឧកញ៉ា វ៉េង លីតិចឡា ដែល រងនូវការប្ដឹងចោទប្រកាន់ ពីបទ ធ្វើទារុណកម្មទៅលើកូនឈ្នួលរបស់ ខ្លួនចំនួន ២នាក់ អស់រយៈពេលជិត ១០ឆ្នាំ មកនោះ ឥឡូវត្រូវបានព្រះរាជអាជ្ញា សម្រេចធ្វើការចោទប្រកាន់ហើយ បន្ទាប់ពី សមត្ថកិច្ច នគរបាលក្រសួងមហាផ្ទៃកសាង សំណុំរឿង បញ្ជូនទៅកាន់តុលាការរួចមក។
ប្រភពព័ត៌មានពីតុលាការ បានឱ្យដឹងថា លោកព្រះរាជអាជ្ញារង មាស ច័ន្ទពិសិដ្ឋ បាន សម្រេចធ្វើការចោទប្រកាន់ឈ្មោះ លី ពៅ កាលពីថ្ងៃទី០៣ ខែមេសា ឆ្នាំ ២០១៣ កន្លងទៅនេះ ពីបទ ធ្វើទារុណកម្មលើអនីតិ ជន រួចហើយបញ្ជូនទៅឱ្យចៅក្រមធ្វើការ ស៊ើបសួរជាបន្ដទៀត ។
ខណៈដែលព្រះរាជអាជ្ញា សម្រេច ធ្វើការចោទ ប្រកាន់នោះ ប្រភពព័ត៌មានពី ខេត្ដបាត់ដំបងបានឱ្យដឹងថា អ្នកស្រី ហ៊ុង សុខា ដែលត្រូវជាម្ដាយធំរបស់កុមារីរង គ្រោះឈ្មោះ សង់ គន្ធា បានអះអាងថា អ្នក ស្រីសម្រេចធ្វើការប្ដឹងទាមទារសំណង ចំនួន ១០០លានរៀល ពីឈ្មោះ លី ពៅ ។ ដោយឡែកក្មេងស្រីម្នាក់ទៀត គេនៅមិន ទាន់ទទួលបានព័ត៌មានថា នឹងទាមទារ សំណងប៉ុន្មាននៅឡើយនោះទេ៕
