សង្គមស៊ីវិលព្រួយបារម្ភពីបញ្ហាជម្លោះដែនសមុទ្ររវាងប្រទេសនៅតំបន់អាស៊ាន
នៅថ្ងៃទី២១ ខែមីនា ឆ្នាំ២០១២ អង្គការសង្គមស៊ីវិលជាតិ និងអន្តរជាតិ បានធ្វើសន្និសីទកាសែតមួយនៅសណ្ឋាគារកាំបូឌីយ៉ាណា (Cambodiana) រាជធានីភ្នំពេញ។ ដែលបានលើកឡើងថា នៅសតវត្សទី២១នេះ គឺមានជម្លោះដែនសមុទ្ររវាងប្រទេសនៅតំបន់អាស៊ានកាន់តែខ្លាំងឡើង ដែលជាកត្តាគួរឲ្យព្រួយបារម្ភ ពិសេសជម្លោះសមុទ្រចិនខាងត្បូង។
លោក ឈៀង វណ្ណារិទ្ធិ នាយកប្រតិបត្តិនៃវិទ្យាស្ថានខ្មែរសម្រាប់សហប្រតិបត្តិការ និងសន្តិភាព (CICP) បាននិយាយថា នៅថ្ងៃទី២២ ខែមីនា អង្គការរបស់លោកសហការជាមួយមជ្ឈមណ្ឌលសម្រាប់សិក្សាយុទ្ធសាស្ត្រ អាស៊ី-ឥណ្ឌា (CASS-India) នឹងរៀបចំសន្និសីទអន្តរជាតិ ស្ដីអំពីអាស៊ាន និងគម្រប់ខួបលើកទី១០ នៃសេចក្ដីថ្លែងការណ៍រួមស្ដីពីដំណើរការរបស់បណ្ដាភាគីនៅសមុទ្រចិនខាងត្បូង នៅសណ្ឋាគារអ៊ីនធើ ខនធីណេនថល (Inter-Continental) ក្នុងទីក្រុងភ្នំពេញ និងមានវាគ្មិនជាតិ ៨រូប និងអន្តរជាតិ ៨រូប ចូលរួមក្នុងការពិភាក្សាអំពីបញ្ហានេះ ដែលគេធ្វើឡើង ។
លោក ឈៀង វណ្ណារិទ្ធិ បានបន្តថា មូលហេតុចម្បងរៀបចំសន្និសីទអន្តរជាតិនេះ ដើម្បីពិភាក្សាគ្នារិះរកយន្តការដោះស្រាយជម្លោះសមុទ្រចិនខាងត្បូង វាជាជម្លោះដ៏ចម្បងមួយក្នុងអាស៊ាន ដែលមានសក្ដានុពលធ្វើឲ្យផ្ទុះរាលដាលនៅអាស៊ីទាំងមូល។ ដូច្នេះការបង្កើតសន្តិភាព និងយន្តការដោះស្រាយជម្លោះផ្សេងៗ ដើម្បីឈានទៅរកការព្រមព្រៀងរួមមួយក្នុងការដោះស្រាយជម្លោះដោយសន្តិវិធី។
លោក អារ៉ាតា ម៉ាហាប៉ាត្រា (Arata B. Mahapatra) ជានាយកមជ្ឈមណ្ឌលសម្រាប់សិក្សាយុទ្ធសាស្ត្រអាស៊ី-ឥណ្ឌា បានលើកឡើងថា បញ្ហាអំណាចសមុទ្រ មានតួនាទីសំខាន់ក្នុងការអភិវឌ្ឍសេដ្ឋកិច្ច និងដឹកនាំបណ្ដាប្រទេសនៅក្នុងតំបន់ ដែលជាកត្តាដណ្ដើមប្រយោជន៍ប្រកួតប្រជែងពាក់ព័ន្ធទៅនឹងជម្លោះពាសពេញរដ្ឋអធិបតេយ្យភាពនៃតំបន់សមុទ្រ។
ទាក់ទិននឹងបញ្ហាជម្លោះសមុទ្រចិនខាងត្បូង វារីកដុះដាលធំដំបូងកាលពីឆ្នាំ២០១០ ខែកក្កដា នៅខណៈដែលវៀតណាម ធ្វើជាម្ចាស់ផ្ទះកិច្ចប្រជុំអាស៊ាន ដែលមានរដ្ឋមន្ត្រីការបរទេសចំនួន ២៧ប្រទេសចូលរួម មានចិន កូរ៉េខាងត្បូង អូស្រ្តាលី និងមានប្រទេសជាច្រើនទៀត៕
