អគ្គិភ័យសាលាអ៊ិស្លាមមួយនៅក្រុង Yangon អាចបញ្ឆេះអំពើហិង្សាសាសនានៅមីយ៉ាន់ម៉ាថែមទៀត
មានការបារម្ភថា អគ្គិភ័យកាលពីយប់មិញ នៅសាលារៀនអ៊ិស្លាមមួយនៅ ក្នុងក្រុង Yangon ដែលបណ្ដាលឲ្យមានការបាត់បង់ជីវិតនោះ អាចបញ្ឆេះឲ្យមានអំពើហិង្សាថែមទៀតរវាងពុទ្ធសាសនិក និងអ៊ិស្លាមសាសនិកនៅក្នុងប្រទេសមីយ៉ាន់ម៉ា។
អគិ្គភ័យដែលបានឆេះបំផ្លាញសាលារៀនអ៊ិស្លាមមួយកន្លែងនៅជាប់ព្រះ វិហារអ៊ិស្លាមបានសម្លាប់ក្មេងប្រុស ១៣នាក់។
ក្មេង ប្រុសទាំងនោះបានថប់ដង្ហើមស្លាប់ ដោយពួកគេមិនអាចចេញពីកន្លែងស្នាក់អាស្រ័យនៅក្នុងបរិវេណសាលារៀន ដែលបានជាប់សោ ព្រោះតែការរឹតបន្តឹងសន្តិសុខដោយសារមានការបារម្ភ ក្រោយពីមានអំពើហិង្សានាពេលថ្មីៗនេះប្រឆាំងនឹងអ៊ិស្លាមសាសនិក។
ប៉ូលិស និយាយថា អគ្គិភ័យបានចាប់ផ្ដើមឡើង ដោយសារកំហុសចរន្តអគ្គិសនី ក៏ប៉ុន្តែ អំពើហិង្សាសាសនានាពេលថ្មីៗនេះ បានជំរុញឲ្យមានពាក្យចចាមអារ៉ាមថា អគ្គិភ័យនេះអាចជាអំពើធ្វើឡើងដោយចេតនា។
មានការបញ្ជូនប៉ូលិសកុបកម្មទៅកាន់កន្លែងនៅក្បែរទីតាំងដែលមានភ្លើងឆេះ។
សូមជម្រាបថា ការបះបោរប្រឆាំងនឹងអ៊ិស្លាមសាសនិកនាពេលថ្មីៗនេះបានសម្លាប់មនុស្សជាង៤០នាក់រួចទៅហើយ នៅប៉ែកកណ្ដាលនៃប្រទេសមីយ៉ាន់ម៉ា។
មានការបារម្ភថា អំពើហិង្សាសាសនានេះអាចឆាបឆេះរាលដាលដល់ទីក្រុងធំៗដទៃទៀតនៅក្នុងប្រទេសនេះ៕(Radio Australia)
