លោក ឆាំង យុ ចង់ឲ្យស្ថាបត្យករខ្មែរសាងសង់រូបសំណាក ឬស្តូបរំឭកដល់អ្នកកាសែត
ភ្នំពេញ: នៅថ្ងៃទី១៩ មីនា ២០១២ លោក ឆាំង យុ ប្រធានមជ្ឈមណ្ឌលឯកសារកម្ពុជា ដែលជាស្ថាប័នប្រមូលចងក្រងឯកសារសម័យខ្មែរក្រហម បានសរសេរលិខិតមួយច្បាប់ជូនលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដើម្បីសុំចូលរួមយោបល់ អំពីការសងសង់រូបសំណាក ឬស្តូប ដើម្បីរំឭកដល់អ្នកសារព័ត៌មានជាតិ និងអន្តរជាតិ ដែលបានស្លាប់ និងបាត់ខ្លួន ក្នុងអំឡុងសង្គ្រាម នៅកម្ពុជា ចន្លោះពីឆ្នាំ១៩៧០ ដល់ឆ្នាំ១៩៧៥។
លោក ឆាំង យុ បានលើកឡើងថា រូបសំណាក ឬស្តូប ដើម្បីរំឭកដល់អ្នកសារព័ត៌មានជាតិ និងអន្តរជាតិ ដែលបានស្លាប់ គួរតែរចនាឡើង ដោយស្ថាបត្យករខ្មែរ តាមរយៈការប្រកួតប្រជែងស្នាដៃ។ គំនិតនេះ នឹងជួយលើកតម្កើងស្នាដៃស្ថាបត្យករខ្មែរ និងលើកទឹកចិត្តឲ្យស្ថាបត្យករទាំងឡាយ ចេះច្នៃប្រឌិតខ្ពស់ និងជាម្ចាស់ប្រវត្តិសាស្ត្ររបស់ខ្លួន។
យ៉ាងហោចណាស់ មានអ្នកកាសែតកម្ពុជា និងអ្នកកាសែតបរទេសប្រមាណ ៣៧ នាក់ ត្រូវបានសម្លាប់ និងបាត់ខ្លួន ក្នុងពេលបំពេញបេសកកម្ម នៅប្រទេសកម្ពុជា ចន្លោះពីឆ្នាំ១៩៧០ ដល់ឆ្នាំ១៩៧៥។ ក្នុងនោះ មានជាអាទិ៍ អ្នកកាសែតជនជាតិជប៉ុន ស្លាប់ច្រើនជាងគេ រហូតដល់ទៅ ១០ នាក់ បារាំង ៨ នាក់ អាមេរិក ៧ នាក់ និងអ្នកកាសែតកម្ពុជាចំនួន ៤ នាក់៕