តុលាការកំពូលឥណ្ឌាបដិសេធសិទ្ធិប៉ាតង់នៃឱសថព្យាបាលជំងឺមហារីកប្រភេទថ្មី Glivec
បណ្ដា ក្រុមអ្នកថែទាំសុខភាពមួយចំនួនបានស្វាគមន៍ចំពោះសេចក្ដីសម្រេចរបស់ តុលាការកំពូលនៃប្រទេសឥណ្ឌាដែលបានបដិសេធចំពោះពាក្យសុំធ្វើឡើង ដោយក្រុមហ៊ុនប្រទេសស្វ៊ីសឈ្មោះ Novartis សម្រាប់ការពារសិទ្ធិប៉ាតង់នៃឱសថព្យាបាលជំងឺមហារីកប្រភេទថ្មីមាន ឈ្មោះថា Glivec។
សិទ្ធិប៉ាតង់នៃឱសថអាចនឹងការពារមិនឲ្យមានការផលិតឱសថដូចគ្នានេះដោយតម្លៃថោក។
តុលាការ កំពូលឥណ្ឌាបានឲ្យដឹងថា ឱសថថ្មីឈ្មោះ Glivec សម្រាប់ព្យាបាលជំងឺមហារីក គឺពុំមានលក្ខណៈគ្រប់គ្រាន់ក្នុងការទទួលបានសិទ្ធិប៉ាតង់តាម ច្បាប់របស់ប្រទេសឥណ្ឌា ដោយសារឱសថថ្មីនេះមិនមានភាគខុសប្លែកគ្នាខ្លាំងទៅនឹងឱសថដែលផលិត នៅពេលមុននោះទេ។
ថ្នាំ Glivec មានតម្លៃរាប់រយដុល្លារក្នុងការព្យាបាលមួយលើកៗ។ ក៏ប៉ុន្តែថ្នាំនេះដែលផលិតនៅក្នុងប្រទេសឥណ្ឌាគឺអាចលក់ចេញ ក្នុងតម្លៃមួយយ៉ាងទាប។ ទីភ្នាក់ងារជំនួយនៃក្រុមគ្រូពេទ្យគ្មានព្រំដែនបាននិយាយថា ការសម្រេចរបស់តុលាការនេះនឹងជួយដល់ជីវិតមនុស្សរាប់លាននាក់នៅ ក្នុងប្រទេសកំពុងអភិវឌ្ឍ ព្រោះវាមានន័យថា ក្រុមហ៊ុនផលិតឱសថអាចបន្តផលិតថ្នាំដែលមានតម្លៃថោកមានគុណភាព ដូចគ្នានឹងថ្នាំ Glivec នេះ។
ក្រុមហ៊ុន ឱសថ Novartis ដែលផលិតថ្នាំ Glivec និយាយថា ការសម្រេចរបស់តុលា ការនេះនឹងមិនលើកទឹកចិត្តក្នុងការផ្តួចផ្ដើម ផលិតឱសថថ្មីទៅថ្ងៃអនាគត ឡើយ៕ (Radio Australia)
