កូរ៉េខាងជើងបានបញ្ជាក់ជាថ្មីអំពីស្ថានភាពសង្រ្គាមជាមួយកូរ៉េខាងត្បូង
កូរ៉េខាងជើងបន្តប្រើសម្តី ទ្រគោះបោះបោកជាមួយកូរ៉េខាងត្បូង។ នៅថ្ងៃសៅរ៍ ទី៣០ មីនានេះ ទីភ្នាក់ងារផ្លូវការកូរ៉េខាងជើងបានប្រកាសឲ្យដឹងថា ទីក្រុងព្យុងយ៉ាងកំពុងស្ថិតក្នុងស្ថានភាពសង្រ្គាមជាមួយទីក្រុង សេអ៊ូល។ ការគំរាមកំហែងថ្មីនេះត្រូវបានសហរដ្ឋអាមេរិកចាត់ទុកថា ប្រាកដប្រជា តែកូរ៉េខាងត្បូងមិនបានចាត់ទុកថា ជារឿងធំដុំនោះទេ។
« ចាប់ ពីពេលនេះតទៅ ទំនាក់ទំនងរវាងកូរ៉េទំាងពីរគឺស្ថិតក្នុងស្ថានភាពសង្រ្គាម ហើយរាល់គ្រប់បញ្ហារវាងកូរ៉េទំាងពីរនឹងត្រូវដោះស្រាយដោយអនុលោម តាមពិធីសារក្នុងសម័យសង្រ្គាម » នេះជាសេចក្តីថ្លែងរបស់របបកុម្មុយនិស្តក្រុងព្យុងយ៉ាងនៅក្នុង សេចក្តីជូនដំណឹងមួយចែកចាយឲ្យគ្រប់ស្ថានប័នទំាងអស់នៅក្នុង ប្រទេស។ សេចក្តីជូនដំណឹងដែលបានផ្សព្វផ្សាយនៅក្នុងទីភ្នាក់ងារផ្លូវការ កូរ៉េខាងជើងបានបញ្ជាក់បន្ថែមយ៉ាងច្បាស់ៗថា ចប់ហើយការស្រមើស្រមៃដែលបានព្រាងទុកតំាងពីយូរយារដែលថាកូរ៉េ ទំាងពីរនឹងអាចរួមសុខ រួមទុក្ខដោយសន្តិភាពជាមួយគ្នានោះ។
តាមពិតទៅ ការគំរាមកំហែងថ្មីរបស់កូរ៉េខាងជើងនៅពេលនេះគ្រាន់តែជាការបន្ថែម លើការគំរាមកំហែងដែលរដ្ឋអំណាចក្រុងព្យុងយ៉ាងបានធ្វើនាប៉ុន្មាន សប្តាហ៍ចុងក្រោយនេះតែប៉ុណ្ណោះ ពោលគឺមិនមានអ្វីគួរឲ្យប្លែក និងភ្ញាក់ផ្អើលនោះទេ។ តែជាការកត់សម្គាល់ រាល់ការគំរាមកំហែងរបស់កូរ៉េខាងជើងតែងតែបានទទួលការព្រមានទុកជា មុនពីសំណាក់កូរ៉េខាងត្បូង និងសហរដ្ឋអាមេរិក។ អាមេរិកដែលបានចាត់ទុកការគំរាមកំហែងថ្មីរបស់កូរ៉េខាងជើងលើកនេះថា ប្រាកដប្រជា និងថា អាមេរិកបានត្រៀមខ្លួនជាប់ជាប្រចំាជាមួយសម្ព័ន្ធមិត្តកូរ៉េខាងត្បូង ដើម្បីវាយបកវិញនៅក្នុងករណីចំាបាច់។
សូមរម្លឹកឡើងវិញបន្តិចថា ពិតមែនតែសង្រ្គាមកូរ៉េបានបិទបញ្ចប់តំាងពី ៦០ឆ្នំាក៏ដោយក្តី ក៏ជាលក្ខណៈបច្ចេកទេស បងប្អូនបង្កើតគូសត្រូវទំាងពីរនៅតែស្ថិតក្នុងសង្រ្គាមរវាងគ្នា ដដែល ព្រោះថា ភាគីទំាងពីរនៅមិនបានចុះកិច្ចព្រមព្រៀងសន្តិភាពរវាងគ្នានៅឡើយទេ ពោលគឺមានតែយុទ្ធ សន្តិភាពប៉ុណ្ណោះដែលបានចុះហត្ថលេខារួមគ្នា។ ថ្មីៗនេះទៀត និងដើម្បីឆ្លើយតបនឹងការធ្វើសមយុទ្ធរវាងទាហានកូរ៉េខាងត្បូង និងអាមេរិក កូរ៉េខាងជើងបានប្រកាសព្រមានលប់ចោលយុទ្ធសន្តិភាព និងរាល់សន្ធិសញ្ញាសន្តិភាពទំាងអស់ដែលបានចុះហត្ថលេខារួមគ្នា។
យ៉ាងណាក៏ដោយ ក្រុមអ្នកឯកទេសបានបញ្ជាក់ថា គ្រប់ការគំរាមកំហែងរបស់កូរ៉េខាងជើងគ្រាន់តែជាការបំភ្លៃវោហោរដែល គ្មានមូលដ្ឋានជាក់ច្បាស់អ្វីទេ។ រីឯកូរ៉េខាងត្បូងក៏មិនបានចាត់ទុកថា ជារឿងធំដុំដែរ។ តែក្រសួងការពារជាតិកូរ៉េខាង ត្បូងបានប្រកាសឲ្យដឹងថា ទាហានរបស់ខ្លួនបានត្រៀមខ្លួនរួចជាស្រេចហើយដើម្បីធ្វើការវាយបក វិញនៅក្នុងករណីណាដែលមានការវាយប្រហារពីទាហានកូរ៉េខាងជើងនោះ។ តែក្នុងខណៈនេះ ទីក្រុងសេអ៊ូលបានបញ្ជាក់ថា គេនៅមិនឃើញមានចលនាចល័តទ័ពអ្វីគួរឲ្យកត់សម្គាល់នៅតាមព្រំដែន នោះទេ៕ដោយ គួច គន្ធារ៉ា (RFI)