ស្ត្រី ៣នាក់រងរបួសធ្ងន់ ខណៈកំពុងជិះម៉ូតូ ត្រូវរថយន្តបុក
Cambodia News
ភ្នំពេញ៖ កាលពីម៉ោង១ រំលងអធ្រាត្រ ឈានចូលថ្ងៃទី១ ខែមេសា រថយន្តកាមារីឆ្លាម បុកជាមួយម៉ូតូC125 សេរីឆ្នាំ២០១១ បណ្តាលឲ្យស្ត្រី៣នាក់រងរបួសធ្ងន់ ស្ថិតនៅត្រង់ចំណុចលើស្ពានជ្រោយចង្វារ ក្នុងសង្កាត់ស្រះចក ខណ្ឌដូនពេញ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុរថយន្តកាមរីឆ្លាមពណ៌ខៅ្ម ពាក់ស្លាកលេខ ភ្នំពេញ 2I-7568 បើកបរដោយបុរសម្នាក់ និងអ្នករួមដំណើរ២នាក់ទៀត ឆ្លងស្ពានជ្រោយចង្វារ ក្នុងទិសដៅពីកើតទៅលិច លុះបើកទៅដល់ចំណុចកណ្តាលស្ពាន ក៏បោះពួយយ៉ាងលឿនទៅបុក ម៉ូតូC125 សេរីឆ្នាំ២០១១ ពណ៌ខ្មៅ ចំពីមុខពេញទំហឹង ដែលស្ត្រី៣នាក់កំពុងជិះឌុបគ្នាឆ្លងស្ពាន ក្នុងទិសដៅច្រាសគ្នា បណ្តាលឲ្យភាគីខាងម៉ូតូរបួសធ្ងន់ទាំង៣នាក់។
ក្រោយកើតហេតុ ជនរងគ្រោះទាំង៣នាក់ ត្រូវរថយន្តសង្គ្រោះបន្ទាន់ ដឹកយកទៅព្យាបាលនៅមន្ទីរពេទ្យកាល់ម៉ែត្រ ចំណែករថយន្តនឹងម៉ូតូ ត្រូវសមត្ថកិច្ចយកទៅរក្សាទុកនៅការរិយាល័យនគរបាលចររាច រណ៍រាជធានីភ្នំពេញ៕ ហេង នាង
