ជិះម៉ូតូប៉ះជាមួយរថយន្តដួលបោកក្បាលស្លាប់
Cambodia News
ភ្នំពេញ៖ កាលពីវេលាម៉ោង ១៩ និង ២០ នាទីយប់ថ្ងៃទី ៣១ ខែមិនា បុរសម្នាក់ជាជនជាតិវៀតណាមម្នាក់ ជិះម៉ូតូទៅប៉ះជាមួយទ្វាររថយន្ត មួយគ្រឿងដែលកំពុងជិះស្របគ្នា បណ្តាលឲ្យ បុរសជាម្ចាស់ម៉ូតូដួលបោកក្បាលទៅនឹងខឿនផ្លូវ ស្លាប់នៅនឹងកន្លែងកើតហេតុ នៅចំណុចគល់ស្ពានអាកាសក្បាលថ្នល់ តាមបណ្តោយផ្លូវជាតិលេខ ១ សង្កាត់ចាក់អង្រែលើ ខណ្ឌមានជ័យ ។
បុរសដែលស្លាប់បាត់បង់ជីវិតខាងលើ មានឈ្មោះ លី តាំ ភេទប្រុស អាយុ ៣៨ ឆ្នាំ ស្នាក់នៅផ្ទះជួលសង្កាត់បឹងត្របែក ខណ្ឌចំការមន ។ ចំណែករថយន្តបង្កហេតុម៉ាកហាយលែនឌ័រ ពណ៌ទឹកប្រាក់ បានបើករត់គេចខ្លួនបាត់ក្រោយ ពេលកើតហេតុ ។
សមត្ថកិច្ចបានឲ្យដឹងថា មុនពេលកើតហេតុនោះគេជនរងគ្រោះបានជិះម៉ូតូ ស្របគ្នាជាមួយរថយន្តហាយលែនឌ័រ ក្នុងល្បឿនយ៉ាងលឿនតាមបណ្តោយផ្លូវជាតិលេខ ១ ក្នុងទិសដៅពីត្បូងទៅជើង ខណមកដល់ចំណុចកើតហេតុបុរសរងគ្រោះបានរេចង្កូតម៉ូតូ ទៅប៉ះ នឹងកញ្ចក់រថយន្តហាយលែនឌ័រ បណ្តាលឲ្យដួលបោកក្បាលទៅនឹងថ្នល់រងរបួសរហូតហូរឈាមស្លាប់បាត់បង់ជីវិតនៅនឹងកន្លែងកើតហេតុភា្លមៗតែម្តង៕ ហេង នាង
