កម្ពុជាបញ្រ្ជាបការយល់ដឹងអំពីអាស៊ានដល់យុវជន
កាលពីថ្ងៃទី ១៥ មីនា ២០១២ ក្រុមមន្រ្តីរដ្ឋាភិបាលកម្ពុជា និងសិស្សនិស្សិតជាង ៣០០០នាក់ បានមកជួបជុំគ្នាស្វែងយល់បន្ថែមអំពីសមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន ឱ្យយល់កាន់តែច្បាស់ថែមទៀតនាគ្រាដែលកម្ពុជាធ្វើជាម្ចាស់ផ្ទះកិច្ចប្រជុំកំពូលអាស៊ានឆ្នាំ២០១២។
លោកឧបនាយករដ្ឋមន្រ្តី ហោ ណាំ ហុង រដ្ឋមន្រ្តីក្រសួងការបរទេស បានថ្លែងនៅក្នុងសិក្ខាសាលាថ្នាក់ជាតិអំពីអាស៊ានរបស់ប្រទេសកម្ពុជាថា ជារៀងរាល់ឆ្នាំអាស៊ានបាននាំឱ្យយុវជនរបស់ខ្លួន កាន់តែសិ្នទ្ធស្នាលគ្នានៅក្នុងជំរុំយុវជនអាស៊ាន និងការប្រជុំកាយឫទ្ធិអន្តរជាតិ។
លោកបន្តថាអាស៊ានមានកម្មវិធីផ្លាស់ប្តូរយុវជនទៅវិញទៅមក។ ហើយចាប់ពីឆ្នាំ១៩៧៤មករដ្ឋាភិបាលជប៉ុន បានឧបត្ថម្ភជារៀងរាល់ឆ្នាំ នូវការធ្វើដំណើរកំសាន្តតាមនាវាសម្រាប់យុវជនដែលមកពីប្រទេស អាស៊ាន និងប្រទេសជប៉ុនចំនួនជាង៣០០នាក់៕