ស្ត្រីម្នាក់បានស្លាប់ក្រោយពេលប្តីសំពងនឹងដំបង
ភ្នំពេញ: ស្ត្រីដែលជាអ្នកដើររើសអេតចាយម្នាក់ដែលត្រូវប្តីវាយជាច្រើនដំបង ត្រូវបានគេប្រទះឃើញដេកស្លាប់នៅក្បែរសួនកុមារ វត្តបទុមវតី សង្កាត់ចតុមុខ ខណ្ឌដូនពេញ កាលពីរសៀលវេលាម៉ោង១ ថ្ងៃទី១៤ មីនា ២០១២ ។
ស្ត្រីរងគ្រោះត្រូវបានគេស្គាល់ថា ឈ្មោះ នី អាយុ ៤០ឆ្នាំ រីឯបុរសជាប្តីពុំត្រូវបានគេស្គាល់ឈ្មោះនៅឡើយទេ ដោយសារជននោះបានរត់គេចខ្លួនបាត់។
យោងតាមសម្តីជនអនាថានៅក្បែរនោះបានឲ្យដឹងថា កាលពីថ្ងៃទី ១១ មីនា ស្ត្រីរងគ្រោះនេះមានទំនាស់ជាមួយបុរសជាប្តី ហើយត្រូវបានបុរសជាប្តីនោះយកដំបងវាយជាច្រើនដំបងនៅម្តុំក្បែរព្រះបរមរាជរាំងហើយក៏ដើរទាំងសភាពសំបាកមកដេកនៅចំណុចខាងលើ។
នៅប្រមាណពីរថ្ងៃក្រោយមកគេក៏ឃើញស្ត្រីរងគ្រោះបានទៅរកទិញថ្នាំមកព្យាបាលដែរ ប៉ុន្តែនៅរសៀលថ្ងៃទី ១៤ មីនា ស្រាប់តែឃើញដេកស្លាប់បាត់ទៅហើយ។ ពេលនេះសពស្ត្រីរងគ្រោះត្រូវបានសមត្ថកិច្ចកំពុងធ្វើ ការត្រួតពិនិត្យ និងស្វែងរកមូលហេតុនៃការស្លាប់ឲ្យបានច្បាស់លាស់៕