បុរសម្នាក់ស្រវឹងស្រាបើកម៉ូតូបុកស្ត្រីចំណាស់ម្នាក់ដើរឆ្លងផ្លូវ បណ្តាលឲ្យរបួសធ្ងន់ទាំងពីរនាក់
Cambodia News
ភ្នំពេញ៖ កាលពីវេលាម៉ោង២០និង៤០នាទីយប់ ថ្ងៃទី២៥ ខែមិនា បុរសស្រវឹងស្រាម្នាក់ ជិះម៉ូតូបុកស្ត្រីចំណាស់ដែលកំពុងដើរឆ្លងផ្លូវបណ្តាលឲ្យរបួសធ្ងន់ ទាំងពីរនាក់ នៅតាមបណ្តោយផ្លូវបេតុង២៨គ្រួសារ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពពត៌មានពីកន្លែងកើតហេតុបានឲ្យដឹងថា ស្ត្រីរងគ្រោះខាងលើឈ្មោះ ទូច ថាវី អាយុ៤៧ឆ្នាំ មុខរបរជាអ្នកលក់ត្រី មានទីលំនៅភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ។ មុនពេលកើតហេតុ គេបានសង្កេតឃើញបុរសម្នាក់ បើកបរម៉ូតូមួយគ្រឿងម៉ាកឌ្រីមសេ១២៥ ពណ៌ខ្មៅ ស៊េរី២០០៨ ស្ថិតក្នុងស្ថានភាពស្រឹវឹងស្រាជោក បានបើកយ៉ាងលឿនតាមបណ្តោយផ្លូវបេតុង២៨គ្រួសារ ក្នុងទិសដៅពីលិចទៅកើត ក៏ជ្រុលចង្កូតទៅបុកស្ត្រីចំណាស់ម្នាក់ដែលដើរឆ្លងផ្លូវចំពីមុខ នោះ ពេញទំហឹងតែម្តង បណ្តាលឲ្យរងរបួសធ្ងន់ទាំងពីនាក់( ម្ចាស់ម៉ូតូ និងជនរងគ្រោះ)។
ក្រោយពេលកើតហេតុជនរងគ្រោះត្រូវរថយន្តសាមុយដឹកយកសង្គ្រោះនៅ មន្ទីរពេទ្យ ចំណែកឯម៉ូតូត្រូវ សមត្ថកិច្ចដកហូតយកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីដោះស្រាយតាមច្បាប់៕ ហេង នាង
