អតីតសមាជិកក្រុមស្រមោចក្រហមនាង សៀក ចិន្ដារ៉ាវី រៀបការ
Cambodia News
ភ្នំពេញ៖ អតីតសមាជិកក្រុមស្រមោចក្រហមនាង សៀក ចិន្ដារ៉ាវី បានរៀបអាពាហ៍ពិពាហ៍ហើយកាលពីថ្ងៃទី២២ ខែមិនា ឆ្នាំ ២០១៣ នៅមជ្ឈមណ្ឌលម៉ុងឌីយ៉ាល់ជា មួយលោក លី សេងហួត ដែលមិនមែនជាអ្នកសិល្បៈ ។
នេះជាអាពាហ៍ពិពាហ៍លើកទី២ហើយសម្រាប់អតីតតារាចម្រៀងរូបនេះ បន្ទាប់ពីនាងបានរៀបការម្តងរួចមកហើយ តែបានបែកបាក់ទៅវិញដោយបានបន្សល់ទុកនូវចំណងដៃកូនម្នាក់ដែលបច្ចុប្បន្នកូនម្នាក់នោះកំពុងស្ថិតក្នុងការគ្រប់គ្រងរបស់អតីតស្វាមីដំបូងរបស់នាង។
បើទោះជាអាពាហ៍ពិពាហ៍របស់នាងនាពេលនេះពុំសូវមានវត្តមានអ្នកសិល្បៈចូលរួម ច្រើនយ៉ាងណាក៏ដោយតែនាង សៀក ចិន្ដារ៉ាវី បានសម្ដែងទឹកមុខ និងអារម្មណ៍សប្បាយរីករាយបិទមាត់មិនជិតក្នុងពិធីរៀបការលើកទី២របស់ខ្លួន។
ក្នុងក្តីសប្បាយរីករាយអតីតតារាចម្រៀងក្នុងក្រុមស្រមោចក្រហមរូបនេះ បានសម្តែងនូវអំណរគុណដល់ភ្ញៀវកិត្តិយសទាំងអស់ដែលបានចូលរួម នៅក្នុងពិធីដ៍មានអត្ថន័យសម្រាប់នាងជាលើកទី២នាពេលនេះ។
ទស្សនិកជនមួយចំនួនប្រហែលជាមិនទាន់ភ្លេចនៅឡើយទេ ចំពោះក្រុមស្រមោចក្រហមដែលធ្លាប់មានឈ្មោះ ល្បីល្បាញក្នុងពេលកន្លងទៅ ប៉ុន្តែក្រុមនេះបានបែកបាក់គ្នាទៅវិញនៅក្នុងឆ្នាំ២០០៥។
ក្រោយពីសាងភាពល្បីល្បាញក្នុងពិភពសិល្បះ នាង សៀក ចិន្ដារ៉ាវី ត្រូវបានគេដឹងថា នាងបានជួបរឿងអាកុសល្យមួយក្នុងជីវិតឯកជនរបស់នាង ដោយត្រូវជនមិនស្គាល់មុខតាមបាញ់ប្រហារផ្តាច់ជីវិត ក្រោយពេលរូបនាងបានបដិសេធការសុំស្រលាញ់ពីបុរសម្នាក់ដែលតែងតែទូរស័ព្ទមកនាងស្ទើមិនដាច់នោះ។
ក្រោយពីរងការបាញ់ប្រហារនោះរួចមក នាង សៀក ចិន្តារ៉ាវី បានសម្ងំលាក់ខ្លួន ដើរចេញពីសិល្បះ ដើម្បីគេចចេញពីស្រមោលដ៏គួឲ្យខ្លាចនេះ។
យ៉ាងណាក៏ដោយក្រោយពីរឿងនេះបានស្ងប់ស្ងាត់នៅក្នុងអំឡុងឆ្នាំ២០០៩ តារាចម្រៀងរូបនេះបានប្រឡូកចូលសិល្បៈវិញនៅតាមភោជនីយដ្ឋាន និងតាមរោងការ នានានិងបង្ហាញវត្តមាននៅតាមកញ្ចក់ទូរទស្សន៍ក្នុងស្រុកមួយចំនួន ក្នុងនាមជាតារាកិត្តិយសផងដែរ។
បើទោះបីជាការចេញមុខជាថ្មីរបស់នាងក្នុងសង្វៀនសិល្បះ តែកេរ្តិ៍ឈ្មោះរបស់នាងនៅអាជីពមួយនេះ ហាក់មិនសូវជាទទួលបានជោគជ័យដូចទៅនឹងអ្វីដែលនាងធ្លាប់ទទួលបានក្នុងពេលជាសមាជិកក្នុងក្រុមស្រមោចក្រហមនោះដែរ។
នាង សៀក ចិន្ដារ៉ាវី ស្ទើរតែដើរចេញទាំងស្រុងពីវិស័យសិល្បះនេះទៅហើយ បន្ទាប់ពីនាងបានសម្ងំមិនបានចេញមុខក្នុងវិស័យសិល្បះឲ្យបានញឹកញាប់ដូចជាពេលមុន បើសម្បីតែវង្សភក្ត្រដ៏ស្រស់ផូរផង់របស់នាងធ្វើឲ្យទស្សនិកស្ទើរតែភ្លេចបាត់ទៅហើយនោះ។
ក្រោយពីបាត់មុខមួយរយះវែងនោះ ស្ងាត់ៗស្រាប់តែអតីតតារាចម្រៀងរូបនេះបានលេចមុខរៀបអាពាហ៍ពិពាហ៍ជាលើកទី២ដ៏គួឲ្យភ្ញាក់ផ្អើលនាពេលនេះ៕ ស.រ
