ជនជាតិ ចិនបើករថយន្តបុកបាក់ទ្រូងផ្លូវអស់ ៥កង់ នឹងម៉ូតូពីរគ្រឿងរងរបួសធ្ងន់ស្រាល ៣នាក់
Cambodia News
ភ្នំពេញ៖ កាលពីវេលាម៉ោង ២៣និង៤០នាទីយប់ ថ្ងៃទី២០ ខែមិនា ជនជាតិចិនម្នាក់ដែលថិតក្នុងស្ថានភាពស្រវឹងស្រា បានបើករថយន្តក្នុងល្បឿនយ៉ាងលឿន បានរេចង្កូតបុករបាំងថ្មចែកទ្រូងផ្លូវ នៅតាមបណ្តោយមហាវិថីព្រះមុនីវង្ស កែងផ្លូវលេខ៤៣២ ទល់មុខស្ថានទូតវៀតណាម ក្នុងសង្កាត់បឹងត្របែក ខណ្ឌចំការមន បាក់អស់ចំនួន៥កង់ ហើយរថយន្តបន្តបើករត់គេចខ្លួនទៅបុកម៉ូតូពីរគ្រឿងទៀត បណ្តាលឲ្យមនុស្សបីនាក់រងរបួសធ្ងន់ស្រាល។
នគរបាលចរាចរបានឲ្យដឹងថា មុនពេលកើតហេតុ បុរសជាជនជាតិចិនម្នាក់ វ័យជាង៤០ឆ្នាំ ដែលថិតក្នុងសភាពស្រវឹងស្រា បានបើករថយន្តម៉ាក មែកសឺដេស ពណ៌ខ្មៅ ពាក់ស្លាកលេខ ភ្នំពេញ 2L-7554 តាមបណ្តោយមហាវិថីព្រះមុនីវង្ស ក្នុងទិសដៅពីជើងទៅត្បូង ដែលបានបើកយ៉ាងលឿន ខណៈមកដល់ចំណុចកើតហេតុ បានរេចង្កូតបុករះថ្មចែកទ្រូងផ្លូវ បាក់អស់៥កង់ ហើយរថយន្តបង្កហេតុនេះ បានព្យាយាមបើករត់គេចខ្លួនបណ្តាលឲ្យជ្រុលល្បឿនទៅបុកម៉ូតូពីរគ្រឿង ទៀត ដែលកំពុងជិះពីមុខ បណ្តាលឲ្យម្ចាស់ម៉ូតូចំនួន៣នាក់ ក្នុងនោះម្នាក់រងរបួសធ្ងន់ និងពីរនាក់រងរបួសស្រាល ចំណែកឯរថយន្តគាបក្បាលជាប់នឹងម៉ូតូបន្តដំណើរទៅមុខលែងរួច។
ក្រោយកើតហេតុ រថយន្តបង្កនិងម៉ូតូជនរងគ្រោះទាំងពីរគ្រឿង រួមជាមួយបុរសជាជនជាតិចិន បើកបររថយន្តបង្កហេតុ យកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីដោះស្រាយតាមផ្លូវច្បាប់៕ ហេង នាង
