តៃវ៉ាន់នឹងដាក់មីស៊ីលរយៈចំងាយមធ្យម ៥០ តំរង់ទិសទៅរកចិន
នៅថ្ងៃចន្ទនេះ យោងតាមសារព័ត៌មានមួយប្រចាំនៅកោះតៃវ៉ាន់ ចាប់ពីឆ្នាំ២០១៤ទៅ តៃវ៉ាន់នឹងដាក់មីស៊ីលដែលបាញ់បានចំងាយមធ្យម ចំនួន ៥០គ្រឿង តំរង់ទិសទៅរកមូលដ្ឋានទាហាននានា ដែលស្ថិតនៅភាគអាគ្នេយ៍ប្រទេសចិន។ មីស៊ីលទាំងនេះ មានឈ្មោះថា Yun Feng អាចបាញ់បានចំងាយរហូតដល់ជាងមួយពាន់គីឡូម៉ែត្រ។
បើ យោងតាមសារព័ត៌មាន China Times ដែលជាសារព័ត៌មានប្រចាំថ្ងៃនៅតៃវ៉ាន់ មីស៊ីលរយៈចំងាយមធ្យមចំនួន៥០ ដែលតៃវ៉ាន់ត្រៀមនឹងដាក់តំរង់ទិសទៅរកប្រទេសចិននោះ អាចបាញ់បានចំងាយជាងមួយពាន់គីឡូម៉ែត្រ។
មីស៊ីល ទាំងនេះ មានឈ្មោះថា Yun Feng ច្នៃប្រឌិតឡើងដោយវិទ្យាស្ថានសាធារណៈផ្នែកបច្ចេកទេសនិងវិទ្យាសាស្ត្រ Chung-San ដោយមានជំនួយពីប្រទេសមួយនៅអឺរ៉ុប។ ប៉ុន្តែ គេមិនបានប្រាប់ឈ្មោះរបស់ប្រទេសនោះឡើយ។
ចាប់ពីឆ្នាំ ២០១៤ទៅ មីស៊ីលទាំងនេះនឹងត្រូវដាក់នៅតាមភ្នំនានាដែលស្ថិតនៅកណ្តាលកោះ តៃវ៉ាន់ ហើយមីស៊ីលទាំងនេះនឹងបែរទិសទៅរកមូលដ្ឋានទាហាននានា ក្នុងនោះមានអាកាសយានដ្ឋាន និងមូលដ្ឋានមីស៊ីល ដែលស្ថិតនៅតាមបណ្តោយឆ្នេរភាគអាគ្នេយ៍ប្រទេសចិន។
យោងតាមសារព័ត៌មាន China Times តៃវ៉ាន់បានច្នៃប្រភេទមីស៊ីលនេះឡើង ដើម្បីឆ្លើយតបទៅនឹងការគំរាមកំហែងរបស់ចិន។ គួររំលឹកថា កាលពីឆ្នាំ ១៩៩៦ ចិនបានបាញ់មីស៊ីលនៅក្បែរដែនដីកោះតៃវ៉ាន់ ដែលជាការគំរាមមួយដល់កោះនេះ។ ថ្មីៗនេះដែរ អឌិតរដ្ឋមន្ត្រីក្រសួងការពារជាតិតៃវ៉ាន់ លោក Michael Tsai បានសរសេរនៅក្នុងសៀវភៅមួយថា នៅឆ្នាំ ២០០៨ តៃវ៉ាន់សំរេចបាននូវមីស៊ីលដែលបាញ់បានចំងាយមធ្យម សំរាប់បាញ់សំដៅទៅរកចិន។
ក្រសួងការពារជាតិតៃវ៉ាន់បានបដិសេធ មិនធ្វើអត្ថាធិប្បាយអ្វីទាំងអស់ទាក់ទងនឹងព័ត៌មានដែលលើកឡើងដោយ កាសែត China Times។ ដោយឡែក យោងតាមអ្នកជំនាញយោធានានា ប្រទេសចិនមានមីស៊ីលចំនួន ១៦០០ បែរទិសមករកកោះតៃវ៉ាន់។
កោះតៃវ៉ាន់បានផ្តាច់ខ្លួនឯករាជ្យពីចិន កាលពីឆ្នាំ១៩៤៩។ ប៉ុន្តែ ចិនបានចាត់ទុកថាតៃវ៉ាន់ជាកោះឧទ្ទាម ហើយមិនបានបដិសេធនឹងការប្រើប្រាស់កម្លាំងបាយ ដើម្បីនឹងយកកោះនេះមកវិញនោះឡើយ៕ដោយ ព្រំ សឿន សូលីណា(RFI)