ពលរដ្ឋខ្មែរបន្តធ្វើចំណាកស្រុកទៅរកការងារធ្វើនៅប្រទេសថៃ មានការកើនឡើង
Cambodia News
ភ្នំពេញ៖ លោក កែម ឡី អ្នកស្រាវជ្រាវឯករាជ្យផ្នែកអភិវឌ្ឍសង្គម មានប្រសាសន៍ថាសព្វថ្ងៃនេះប្រជាពលរដ្ឋខ្មែរដែលធ្វើចំណាកស្រុក ខុសច្បាប់ ទៅរកការងារនៅប្រទេសថៃ តាមច្រករបៀង ក្នុងខេត្តបន្ទាយមានជ័យមានចំនួនកើនឡើងគួរឲ្យបារម្ភ។
លោកបន្តថា ក្នុងមួយថ្ងៃៗមានពលករខ្មែររាប់ពាន់នាក់បានតម្រង់ជួរឆ្លងដែន ចូលទៅរកការងារធ្វើនៅប្រទេសថៃតាមច្រករបៀងតូចៗ មានច្រក អូរបីជាន់ ច្រកបឹងត្រកួន ច្រកព្រៃគប់ ច្រកជោគជ័យ និងច្រកទំនប់ក៥ជាដើម។
លោក កែម ឡី បានអះអាងថាមានប្រជាពលរដ្ឋដែលមានលំនៅដ្ឋានតាមខេត្តជាប់ព្រំដែន មានដូចជាខេត្តប៉ៃលិន បន្ទាយមានជ័យ និងបាត់ដំបងជាដើម ជាង ៩០ភាគរយបានធ្វើចំណាកស្រុកទៅរកការងារធ្វើនៅប្រទេសថៃ និងគ្មានលិខិតឆ្លងដែនស្របច្បាប់ទេ។
បញ្ហា នេះ លោកនាយករដ្ឋមន្ត្រី ហ៊ុន សែន ធ្លាប់បានអំពាវនាវឲ្យប្រជាពលរដ្ឋខ្មែរបញ្ឈប់ធ្វើចំណាកស្រុកទៅរក ការងារធ្វើនៅប្រទេសថៃ ព្រោះកម្ពុជាក៏កំពុងខ្វះកម្លាំងពលកម្មសម្រាប់បំរើការងារក្នុង ស្រុក។ ប៉ុន្តែការអំពាវនាវនេះទំនងដូចជាមិនមានប្រសិទ្ធភាពទេ ដោយពលរដ្ឋខ្មែរអះអាងថាធ្វើការងារនៅប្រទេសថៃទទួលបានប្រាក់ កម្រៃច្រើនជាងការងារក្នុងស្រុក៕
