ជប៉ុនស្វះស្វែងពង្រឹងទំនាក់ទំនងយោធាជាមួយអាស៊ានក្នុងពេលមានជម្លោះជាមួយចិន
នៅថ្ងៃពុធនេះ រដ្ឋាភិបាលជប៉ុនបានស្នើឲ្យមានការរឹតបន្តឹងទំនាក់ទំនងខាងផ្នែក យោធាជាមួយបណ្តាប្រទេសសមាជិកអាស៊ាន។ ការស្វះស្វែងរឹតបន្តឹងទំនាក់ទំនងយោធាជាមួយអាស៊ាននេះ ធ្វើឡើងនៅក្នុងពេលដែលជប៉ុន និងប្រទេសមួយចំនួន ក្នុងតំបន់អាស៊ាន កំពុងមានជម្លោះដែនទឹកជាមួយចិន។
ការស្នើឲ្យមានការរឹតបន្តឹងទំនាក់ទំនងផ្នែកយោធា ត្រូវបានធ្វើឡើងនៅក្នុងកិច្ចប្រជុំថ្នាក់អនុរដ្ឋមន្រ្តី ការពារជាតិជប៉ុន-អាស៊ាន ដែលបើកធ្វើនៅក្នុងទីក្រុងតូក្យូ សម្រាប់រយៈពេល ពីរថ្ងៃ គឺថ្ងៃពុធ និងថ្ងៃព្រហស្បតិ៍ស្អែក។ នេះគឺជាកិច្ចប្រជុំមន្រ្តីការពារជាតិ ក្នុងកម្រិតខ្ពស់លើកដំបូងបង្អស់ រវាងអាស៊ាន និងជប៉ុន ចាប់តាំងពីលោកនាយករដ្ឋមន្រ្តីអភិរក្សនិយម ស្ហ៊ីនហ្សូ អាបេ ឡើងកាន់តំណែង។
ថ្លែងក្នុងពេលបើកកិច្ចប្រជុំដោយបិទទ្វារ នៅថ្ងៃពុធនេះ លោកអាគីណូរី អេតូ (Akinori Eto) អនុរដ្ឋមន្រ្តីក្រសួងការពារជាតិជប៉ុនបានថ្លែងថា “តំបន់អាស៊ីប៉ាស៊ីហ្វិកកំពុងប្រឈមមុខនឹងបញ្ហាចំនួនទាក់ទងនឹង ផ្នែកសន្តិសុខ និងការពារជាតិ ក្នុងនោះ ក៏រួមមានបញ្ហាជម្លោះនៅក្នុងតំបន់សមុទ្រចិនខាងត្បូងផងដែរ។ បន្ថែមពីលើកិច្ចសហប្រតិបត្តិការខាងផ្នែកសេដ្ឋកិច្ច ដែលកំពុងត្រូវបានពង្រឹងពីមួយថ្ងៃទៅមួយថ្ងៃ អាស៊ាន និងជប៉ុនគួរតែពង្រឹងផងដែរនូវទំនាក់ទំនងក្នុងវិស័យសន្តិសុខ និងការពារជាតិ”។
កាលពីថ្ងៃអង្គារម្សិលមិញ នៅមុនពេលបើកកិច្ចប្រជុំ តំណាងក្រសួងការពារជាតិនៃប្រទេសសមាជិកអាស៊ានបានចូលជួបលោក ស្ហ៊ីនហ្សូ អាបេ ដោយបានបង្ហាញនូវក្តីរំពឹងខ្ពស់ថានឹងអាចសហការជាមួយជប៉ុន ក្នុងការដោះស្រាយបញ្ហាសន្តិសុខ ក្នុងតំបន់។ នេះបើយោងតាមសេចក្តីថ្លែងការណ៍របស់ក្រសួងការពារជាតិជប៉ុន។
គួរបញ្ជាក់ថា ជប៉ុន និងប្រទេសមួយចំនួន ក្នុងតំបន់អាស៊ានកំពុងជាប់មានជម្លោះដែនទឹកជាមួយចិន គឺជប៉ុនឈ្លោះជាមួយចិន ក្នុងតំបន់សមុទ្រចិនខាងកើត ហើយប្រទេសអាស៊ាន រួមមាន ហ្វ៊ីលីពីន ម៉ាឡេស៊ី ព្រុយណេ និងវៀតណាម កំពុងជាប់ជម្លោះជាមួយចិន នៅក្នុងសមុទ្រចិនខាងត្បូង។ ក្នុងនេះ ភាពតាន តឹង ដែលកើតមានខ្លាំងជាងគេ គឺរវាងហ្វ៊ីលីពីន-ចិន និងវៀតណាម-ចិន។
ក្រុមអ្នកវិភាគជាច្រើនបានលើកឡើងថា ជម្លោះដែនទឹកជាមួយចិន គឺជាកម្លាំងចលករដ៏សំខាន់មួយ ដែលជំរុញឲ្យមានការបង្កើតសម្ព័ន្ធភាពផ្នែកយោធា នៅក្នុងតំបន់អាស៊ាន និងអាស៊ីប៉ាស៊ីហ្វិក ជាពិសេស រវាងជប៉ុន និងអាស៊ាន ពីព្រោះថា ជប៉ុនជាប្រទេសដែលអាចផ្តល់បច្ចេកវិទ្យា និងគ្រឿងបរិក្ខាយោធាទំនើបៗទៅឲ្យប្រទេសអាស៊ាន ដើម្បីទប់ទល់ជាមួយនឹងចិន។
កាលពីពេលថ្មីៗនេះ មានសេចក្តីរាយការណ៍ថា ជប៉ុនទើបនឹងបានសម្រេចផ្តល់ទៅឲ្យហ្វីលីពីន នូវជំនួយជានាវាល្បាតដែនសមុទ្រជាច្រើនគ្រឿង ដែលសុទ្ធជានាវាល្បាតទំនើបៗ តម្លៃរហូតដល់ទៅជាង ១០លានដុល្លារ ក្នុងមួយគ្រឿងៗ៕ ដោយ សេង ឌីណា (RFI)
