តែងតាំងលោកណេប សារ៉ុនអភិបាលរងក្រុងបាវិតជំនួសលោកឈូក បណ្ឌិត
នៅព្រឹកថ្ងៃទី៩ មីនា ២០១២ នេះ លោកណេប សារ៉ុន អភិបាលរងក្រុងបាវិតនឹងត្រូវប្រកាសឱ្យឡើងកាន់តំណែងជាអភិ បាលក្រុងស្តីទី បន្ទាប់ពីលោកឈូក បណ្ឌិត ត្រូវបានដកបញ្ឈរជើងដោយសាររឿងបាញ់រះនៅលើកម្មការិនី បណ្តាលឱ្យរបួសធ្ងន់៣នាក់ ខណៈពេលកំពុងធ្វើការតវ៉ានៅមុខរោងចក្រកាត់ដេរកៅវ៉េ ក្រុងបាវិត។
យោងតាមប្រភពព័ត៌មានពីមន្ត្រីជាន់ខ្ពស់នៃរាជរដ្ឋាភិបាលបានឱ្យដឹងថា តំណែងអភិបាលក្រុងរបស់លោកឈូក បណ្ឌិត ត្រូវបានបញ្ឈរជើង ខណៈដែលតុលាការខេត្តស្វាយរៀងកោះហៅលោកឱ្យចូលមកបំភ្លឺជុំវិញរឿងបាញ់រះទៅលើកម្មការិនីចំនួន៣នាក់ឲ្យរងរបួសធ្ងន់នៅក្រុងបាវិត។
សូមបញ្ជាក់ថា លោកឈូក បណ្ឌិត ត្រូវព្រះរាជអាជ្ញាអមសាលាដំបូងខេត្ត ចេញដីកាកោះហៅជាផ្លូវការឱ្យចូលខ្លួនមកបំភ្លឺនៅសាលាដំបូងខេត្តនៅថ្ងៃទី១៦ មីនា ខាងមុខនេះ។ បច្ចុប្បន្នសមត្ថកិច្ចបានបញ្ជូនដីកាកោះហៅទៅឱ្យលោកឈូក បណ្ឌិត ហើយ ក៏ប៉ុន្តែពុំទាន់បានដឹងថា លោកឈូក បណ្ឌិត ទទួលបានហើយឬនៅនោះទេ។ ដោយសារពេលនេះគ្មានអ្នកណាម្នាក់ដឹងថា លោកឈូក បណ្ឌិត ស្ថិតនៅទីណានោះដែរ ព្រោះនៅក្រុងបាវិតពុំឃើញវត្តមានលោកឈូក បណ្ឌិត ទេចាប់តាំងពីមានហេតុការណ៍ផ្ទុះអាវុធនោះរួចមក។
កន្លងមកលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានបង្ហាញអត្តសញ្ញាណ អ្នកបាញ់ទៅលើកម្មករ កម្មការិនីឱ្យរបួសធ្ងន់៣នាក់នៅរោងចក្រកៅវ៉េ ក្រុងបាវិត កាលពីថ្ងៃទី២០ កុម្ភៈ ឆ្នាំ២០១២នោះ គឺលោកឈូក បណ្ឌិត អភិបាលក្រុងបាវិត។ ទោះបីជាបែបណាក្រសួងមហាផ្ទៃបានដាក់ពាក្យបណ្តឹងទៅតុលាការហើយ ឯការចាប់ខ្លួនលោកឈូក បណ្ឌិត ឬបែបណានោះអាស្រ័យទៅលើតុលាការ៕