យុវជនម្នាក់ត្រូវរថយន្តបើកបុករងរបួសបាក់ជើងម្ខាង
ភ្នំពេញ៖ កាលពីវេលាម៉ោង ២២និង១៥នាទីយប់ ថ្ងៃទី៥ ខែមិនា យុវជនម្នាក់ ត្រូវយន្តមួយគ្រឿង បើកទៅបុកពេញទំហឹង នៅចំណុចផ្លូវលេខ៣៨៤ កែងផ្លូវលេខ២០៥ ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន បណ្តាលឲ្យរងរបួសបាក់ជើងម្ខាង។
តាមប្រភពពត៌មានបានឲ្យដឹងថា រថយន្តមួយគ្រឿងម៉ាក TOYOTA SIENNANLE ពណ៌ស្ករ អត់មានស្លាកលេខ បើកបរដោយស្ត្រីម្នាក់និងប្តីធ្វើដំណើរតាមបណ្ដោយផ្លូវលេខ២០៥ ក្នុងទិសដៅពីត្បូងទៅជើង ដោយល្បឿនមធ្យម លុះមកដល់ផ្លូវលេខ៣៨៤ រថយន្តបានបើកបុកម៉ូតូមួយគ្រឿងម៉ាក សេ១២៥ ស៊េរី២០១៣ ពណ៌ខ្មៅ ពាក់ស្លាកលេខ ខេមរភូមិន្ទ 1-1234 បើកបរដោយយុវជនម្នាក់ឈ្មោះនួន ឧត្តម អាយុ១៧ឆ្នាំ ជាសិស្ស ស្នាក់នៅសង្កាត់ទួលស្វាយព្រៃទី១ ខណ្ឌចំការមន ដែលធ្វើដំណើរតាមបណ្ដោយផ្លូវលេខ ៣៨៤ ក្នុងទិសដៅពីកើតទៅលិច បណ្ដាលឲ្យបាក់ជើងម្ខង ចំណែកម៉ូតូនិងរថយន្តរងការខូចខាតយ៉ាងដំណំ។
ក្រោយពីកើតហេតុម៉ូតូនិងរថយន្តបង្ក ត្រូវសមត្ថកិច្ចចុះមកវាស់វែង ដកហូតយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីចាត់ការតាមផ្លូវច្បាប់៕ ហេង នាង