ចិនមិនផ្តល់តួលេខថវិកាដែលត្រូវចាយវាយលើវិស័យការពារជាតិដូចមុនឡើយ
នៅ ថ្ងៃចន្ទនេះ ចិនមិនបានផ្តល់ព័ត៌មានលើតួលេខថវិកា ដែលត្រូវចាយវាយលើវិស័យការពារជាតិ សំរាប់ឆ្នាំ ២០១៣ ដូចសព្វដងនោះឡើយ។ ការមិនប្រកាសទឹកប្រាក់របស់ក្រុងប៉េកាំង បានធ្វើឡើងនៅក្នុងសន្និសិទ្ធកាសែត មុនពេលបើកសម័យប្រជុំសភាពេញអង្គ ប្រចាំឆ្នាំ។ គេប៉ាន់ស្មានថា ចិនចង់លាក់ទុករឿងនេះមិនអោយជប៉ុនដឹង ដោយសារតែស្ថានភាពតានតឹងទាក់ទងនឹងជម្លោះដណ្តើមបូរណភាពដែនកោះ សេនកាគូ នៅសមុទ្រចិនខាងកើតជាមួយជប៉ុន។
នៅ ថ្ងៃចន្ទនេះ លោកស្រី Fu Ying តំណាងសភាជាតិចិន បានបដិសេធផ្តល់ដល់អ្នកសារព័ត៌មានបរទេស នូវតួលេខស្តីពីទឹកប្រាក់ដែលចិនត្រូវចាយវាយ ក្នុងឆ្នាំ២០១៣ លើវិស័យយោធាខ្លួន។ ការបដិសេធនេះគឺខុសពីទំលាប់រាល់ដង ដែលតាមធម្មតា តំណាងសភាចិនតែងតែផ្តល់នូវព័ត៌មានទាក់ទងនឹងទឹកប្រាក់ដែល ត្រូវចាយវាយផ្នែកយោធា ប្រចាំឆ្នាំ។
ចិនប្រហែលជាចង់លាក់ទុករឿងនះ មិនអោយជប៉ុនដឹង ដោយសារមកពីជម្លោះដណ្តើមប្រជុំបូរណភាពដែនកោះ សេនកាគូ នៅសមុទ្រចិនខាងកើតជាមួយជប៉ុន។
យោងតាមលោកស្រី Fu Ying តំណាងសភាពេញអង្គចិន ចិនត្រូវការពង្រឹងវិស័យការពារជាតិខ្លួនអោយបានរឹងមាំ។ លោកស្រីបន្ថែមថា ការពង្រឹងវិស័យការពារជាតិចិន ក៏នឹងចូលរួមជួយអោយមានស្ថិរភាពក្នុងតំបន់ផងដែរ។ តំណាងសភាចិនរូបនេះ បានព្រលែងពាក្យយ៉ាងហំហានថា “ប្រសិនបើប្រទេសដ៏ធំដូចជាចិន មិនអាចធានាការពារសុវត្ថិភាពសន្តិសុខរបស់ខ្លួនទេនោះ នោះមិនមែនជាដំណឹងល្អសំរាប់ពិភពលោកទាំងមូលនោះឡើយ”។
ទោះយ៉ាងណា គេនៅរំពឹងថា ចិននឹងអាចប្រាប់ពីតួលេខលើការចាយវាយផ្នែកយោធាឆ្នាំ ២០១៣ នៅពេលដែលសភាចាប់ផ្តើមបំពេញការងាររបស់ខ្លួន ជាពិសេសនៅពេលដែលមានគេធ្វើរបាយការណ៍ផ្នែកហិរញ្ញវត្ថុ។ កាលពីឆ្នាំមុន ចិនបានប្រកាសថានឹងដំឡើងថវិកាវិស័យការពារជាតិខ្លួនអោយបាន ១១,២ភាគរយ សំរាប់ឆ្នាំ ២០១២ គឺស្មើនឹងទឹកប្រាក់ជាង ៦៧០ ពាន់លានយ័ន ដែលត្រូវជាជាង ៨២ពាន់លាន ប្រាក់អឺរ៉ូ។
នេះសអោយឃើញថា ចិនមានមហិច្ឆតាយោធាខ្ពស់ ដែលអាចអោយជប៉ុនមានការព្រួយបារម្ភ ជាពិសេសចិនកំពុងតែផ្គត់ផ្គង់សព្វាវុធដែលមានគុណភាព ខ្ពស់អោយដល់យោធាខ្លួន ពីមួយថ្ងៃ ទៅមួយថ្ងៃ។
ជម្លោះដណ្តើមបូរណភាពដែនកោះ សេនកាគូ នៅសមុទ្រចិនភាគខាងកើត រវាងចិន និងជប៉ុននៅតែជាបញ្ហាក្តៅគគុក។ ស្ថានភាពទំនាក់ទំនងប្រទេសទាំងពីរ កាន់តែតានតឹងឡើងជារៀងរាល់ថ្ងៃ ពិសេសចាប់តាំងពីខែ កញ្ញា ២០១២ មក នៅពេលដែលជប៉ុនបានទិញយកមួយភាគនៃប្រជុំកោះសេនកាគូ ដាក់អោយក្លាយជាដែនដីជាតិខ្លួន។
តាំងពីនោះមក ក្រុងប៉េកាំងតែងតែបញ្ជូននាវា រឺក៏យន្តហោះមកល្បាតជុំវិញតំបន់កោះជម្លោះ ដែលនៅទីនោះ គេក៏ឃើញមានវត្តមានរបស់ទាហានជប៉ុនផងដែរ៕ ដោយ ព្រំ សឿន សូលីណា (RFI)
