និស្សិតស្រីម្នាក់បើករថយន្ត ហើយនិយាយទូរស័ព្ទ រេចង្កូត បុករបាំង ចែកទ្រូងផ្លូវបាក់អស់ ៣ផ្ទាំង
ភ្នំពេញ ៖ កាលពីវេលាម៉ោង ១រសៀល ថ្ងៃទី០១ ខែមីនា និស្សិតស្រីម្នាក់បានបើក រថយន្ដបុករបាំងដែកចែកទ្រូងផ្លូវបាក់ចំនួន៣ផ្ទាំង ស្ថិតនៅខាងលិចមន្ទីរសម្ភពសុខុមាភាព តាម បណ្ដោយផ្លូវ សហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ បណ្ដាលឱ្យរថយន្ដក្រឡាប់ កណ្ដាលផ្លូវ ធ្វើឱ្យមានការស្ទះចរាចរណ៍យ៉ាងខ្លាំង។
និស្សិតស្រី ដែលបើករថយន្ដបុករបាំងដែកចែកទ្រូងផ្លូវខាងលើ បើកបរ រថយន្ដម៉ាកវីសូ ពណ៌ទឹកសមុទ្រ ពាក់ស្លាក លេខ ភ្នំពេញ 2T-4134 ក្នុងទិសដៅពីលិច ទៅកើត គោលបំណងទៅរៀន ហើយមូលហេតុ ដែលនាំឱ្យបុករបាំង ដែកចែកទ្រូងផ្លូវ ខាងលើនេះ ដោយសារតែ រូបគេកំពុងនិយាយទូរស័ព្ទ ហើយបាត់ អារម្មណ៍មួយភាំង ក៏រេចង្កូតតែម្ដងទៅបុករបាំងដែកចែក ទ្រូងផ្លូវ បណ្ដាលឱ្យ បាក់អស់ចំនួន៣ផ្ទាំង ហើយរថយន្ដក្រឡាប់ផ្ងាជើងកណ្ដាលផ្លូវ បង្កឱ្យមានការកកស្ទះចរាចរណ៍យ៉ាងខ្លាំង ។
សាក្សីនៅកន្លែងកើតហេតុ បានឱ្យដឹង ថា នៅពេលរថយន្ដក្រឡាប់នោះគេឃើញ និស្សិតស្រីបានលូនចេញពីរថយន្ដ ប៉ុន្ដែ សំណាងល្អ មិនបង្កឱ្យ រងរបួស ធ្ងន់ធ្ងរនោះ ឡើយ និស្សិតស្រីរូបនេះមានឈ្មោះ ទួន វួចណា អាយុ ១៧ឆ្នាំ ជាសិស្សសាលា ឯកជនមួយ រស់នៅ ក្នុងភូមិបុរី១០០ខ្នង សង្កាត់ទឹកថ្លា ខណ្ឌសែនសុខ ៕ ហេង នាង
