កំពុងជិះម៉ូតូត្រូវ គេជិះម៉ូតូមកធាក់ផ្តួលបណ្តាលឲ្យបោកក្បាលស្លាប់
ភ្នំពេញ៖ កាលពីវេលាម៉ោង ១១៖៥៥នាទី យប់ថ្ងៃទី២៨ ខែកុម្ភៈ យុវជនជានិសិត្សម្នាក់ ត្រូវជនបង្កជិះម៉ូតូចំនួន២គ្រឿងធាក់ផ្តួល នៅពេលដែលជិះម៉ូតូ មកជិតជនរងគ្រោះ បណ្តាយឲ្យបោកក្បាល និងរបាំងចែកទ្រូងផ្លូវ បណ្តាលឲ្យ ស្លាប់ភ្លាមៗ នៅកន្លែងកើតហេតុ ស្ថិតនៅមុខរោងចក្រ គង់ហុង តាមផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ។
ជនរងគ្រោះមានឈ្មោះ ពិល គង្គា អាយុ២១ឆ្នាំ ស្នាក់នៅតាមផ្លូវលេខ ២៥៣ សង្កាត់ទឹកល្អក់ទី៣ ខណ្ឌទួលគោក ត្រូវបានគេធាក់ផ្តួល ខណៈកំពុងជិះម៉ូតូ ម៉ាកស៊ុយស៊ូគី ណិច តែម្នាក់ឯង ពេលមកដល់ ចំណុចកើតហេតុ ។
មុនពេលកើតហេតុ ខណៈជនរងគ្រោះ កំពុងតែជិះម៉ូតូ តែម្នាក់ លុះមកដល់ចំណុច កើតហេតុ ស្រាប់តែមាន ជនបង្កជិះម៉ូតូចំនួន២គ្រឿង មួយគ្រឿងម៉ាក សង់ប៊ិច និងមួយគ្រឿងទៀត ម៉ាក RX បានធាក់ជនរងគ្រោះ បណ្តាលឲ្យដួល បោកក្បាល និងរបាំងចែកទ្រូងផ្លូវ បណ្តាលឲ្យស្លាប់តែម្តង។ យ៉ាងណាក៏ដោយ មិនទាន់ដឹងពីមូលហេតុ ដែលនាំឲ្យ ជនរងគ្រោះ និងជនបង្ក មានបញ្ហាអ្វីកើតឡើងនោះទេ៕ ហេង នាង
