រាជរដ្ឋាភិបាលថៃចង់ជួបជជែកជាមួយក្រុមឧទ្ទាមនៅប៉ែកខាងត្បូងក្នុងប្រទេសម៉ាឡេស៊ី
នៅថ្ងៃពុធ ទី២៧ កុម្ភៈនេះ អ្នកទទួលខុសត្រូវជាន់ខ្ពស់ថៃម្នាក់បានបញ្ជាក់ឲ្យដឹងថា រាជរដ្ឋាភិបាលក្រុងបាងកកចង់រៀបចំកិច្ចប្រជុំសន្តិភាពមួយជាមួយ ក្រុមឧទ្ទាមថៃអ៊ីស្លាមអ្នកទាមទារផ្តាច់ទឹកដីនៅតំបន់ប៉ែកខាងត្បូង ប្រទេសថៃ។ គម្រោងរៀបចំជំនួបចរចាសន្តិភាពនេះនឹងត្រូវធ្វើឡើងនៅក្នុងទីក្រុង កូឡា ឡំាពួរ ប្រទេសម៉ាឡេស៊ី។ ម្យ៉ាងទៀត ជំនួបចរចាជាមួយក្រុមឧទ្ទាមគ្រោងនឹងរៀបចំឡើង ចំពេលដែលអំពើហិង្សានៅតំបន់ប៉ែកខាងត្បូងបានកើតមានច្រើនដងក្នុង រយៈពេលប៉ុន្មានខែចុងក្រោយនេះ។
ការប្រកាសឲ្យដឹងពីគម្រោងជួបចរចារវាងរាជរដ្ឋាភិបាលថៃ និងក្រុមឧទ្ទាមថៃអ៊ីស្លាមអ្នកទាមទារផ្តាច់ទឹកដីនិយមនៅប៉ែកខាងត្បូង បានកើតមានឡើង មួយថ្ងៃមុនជំនួបផ្លូវការរវាងលោកស្រីនាយកដ្ឋមន្រ្តីថៃ យីងឡាក់ ស៊ីណាវ៉ាត់ត្រា និងលោកនាយករដ្ឋមន្រ្តីម៉ាឡេស៊ី ណាយីប រ៉ាហ្ស៉ាក់ ក្នុងទីក្រុងកូឡា ឡំាពួរ ប្រទេសម៉ាឡេស៊ី។ មានសំណុំរឿងជាច្រើនដែលឥស្សរជនទំាងពីរគ្រោងនឹងលើកយកទៅជជែក ជាមួយគ្នា ក៏ប៉ុន្តែ ប្រធានបទសំខាន់មួយដែលមិនអាចខ្វះបាននោះ គឺពាក់ព័ន្ធនឹងចលនាបះបោះរបស់ក្រុមឧទ្ទាមថៃអ៊ីស្លាមអ្នកទាមទារ ផ្តាច់ទឹកដីនិយមនៅក្នុងខេត្តថៃទំាង ៣ ស្ថិតនៅប៉ែកខាងត្បូងជាប់ព្រំដែនរវាងប្រទេសជិតខាងទំាងពីរ។ ចលនាបះបោះរបស់ក្រុមឧទ្ទាមថៃអ៊ីស្លាមបានបណ្តាលឲ្យមានមនុស្ស ស្លាប់ប្រមាណជា ៥ ៥០០នាក់ហើយ គិតតំាងពីឆ្នំា ២០០៤ មក។
« ខ្ញុំសង្ឃឹមថា ជំនួបចរចារវាងរាជរដ្ឋាភិបាលក្រុងបាងកក និងក្រុមឧទ្ទាមអាចនឹងចាប់ផ្តើមនាពេលឆាប់ៗខាងមុខ » នេះជាថ្លែងរបស់លោកឧត្តមសេនីយប៉ារ៉ា ដន ប៉ាត់តាណាថាប៊ុត អគ្គលេខាធិការនៃក្រុមប្រឹក្សាសន្តិសុខជាតិថៃ និងដែលលោកត្រូវជូនដំណើរលោកស្រីយីងឡាក់ទៅប្រទេសម៉ាឡេស៊ី។ លោកប៉ារ៉ា ដនបានបញ្ជាក់ដោយលំអិតថា ប្រទេសម៉ាឡេស៊ីនឹងធ្វើជាម្ចាស់ផ្ទះ ព្រមទំាងជួយសម្រួលឲ្យមានជំនួបរវាងរាជរដ្ឋាភិបាលថៃ និងក្រុមឧទ្ទាមថៃអ៊ីស្លាមអ្នក ទាមទារផ្តាច់ទឹកដីនិយមនៅប៉ែកខាង ត្បូង។ ក៏ប៉ុន្តែ ម៉ាឡេស៊ីនឹងមិនដើរតួនាទីអ្វីនៅក្នុងជំនួបនោះទេ។
គួរជម្រាបជូនថា តំាងពី ៩ឆ្នំាមកហើយ ពោលគឺតំាងតែពីឆ្នំា ២០០៤ មកម្ល៉េះ ដែលក្រុមឧទ្ទាមថៃអ៊ីស្លាមបានវាយប្រហារដោយមិនរើសមុខលើប្រជាជន អ្នកកាន់សាសនាព្រះពុទ្ធ ក៏ដូចជាអ្នកកាន់សាសនាអ៊ីស្លាមនៅតំបន់ប៉ែកខាងត្បូងដែលបានស្ថិត នៅក្រោមការគ្រប់គ្រងរបស់ប្រទេសម៉ាឡេស៊ីរហូតដល់ដើមទសវត្សទី ២០។ ជាតំបន់ដែលសម្បូរដោយប្រជាជនថៃអ្នកកាន់សាសនាអ៊ីស្លាមរស់នៅ នៅក្នុងប្រទេសមួយដែលប្រជាជនភាគច្រើន ជាអ្នកកាន់សាសនាព្រះ ពុទ្ធ។ កាលពី ១០ថ្ងៃមុននេះ ការបំផ្ទុះគ្រាប់បែកជាច្រើនកន្លែងក្នុងខេត្តប៉ាត់តានីបានផ្តាច់ ជីវិតមនុស្ស ៣នាក់។
អស់រយៈពេលជាច្រើនឆ្នំាកន្លងមកហើយ ដែលរដ្ឋាភិបាលក្រុងបាងកកបានសម្រេចជ្រើសយកដំណោះស្រាយតែមួយ គឺវាយប្រហារតាមផ្លូវយោធាលើពួកឧទ្ទាមឲ្យដល់ឫសគល់តែម្តង។ តែបញ្ហានៅត្រង់ថា រដ្ឋាភិបាលថៃនៅមិនបានដឹងច្បាស់អំពីវត្តមាន ឬមួយក៏រចនាសម្ព័ន្ធពិតប្រាកដរបស់ចលនាបះបោរមួយនេះទេ។ ម្យ៉ាងទៀត ពីមួយឆ្នំា ទៅមួយឆ្នំា ចលនាមួយនេះបានពង្រឹងបន្ថែមនូវកម្លំាងរបស់ខ្លួនតាមរយៈការដាក់ បញ្ចូលយុវជនសម័យថ្មីដែលមានលក្ខណៈហិង្សាជាងរៀមច្បងរបស់ពួកគេ។ អ៊ីចឹងហើយបានក្រុមអ្នក វិភាគនយោបាយថៃហាក់ដូចជាមិនសូវមាន សុទិដ្ឋិនិយមប៉ុន្មានទេ អំពីកិច្ចប្រជុំស្វែងរកសន្តិភាពជាមួយក្រុមឧទ្ទាមនោះ ព្រោះថា ជាចលនាមួយដែលគ្មានរូបរាងច្បាស់លាស់ និងមានឯកសណ្ធានចម្រុះ មិនខុសពីសម្លៀកបំពាក់របស់ប្រជាជនធម្មតាទេ៕ដោយ គួច គន្ធារ៉ា (RFI)
