ម៉ូស្គូនិងវ៉ាស៊ីនតោនឯកភាពគ្នាចំពោះដំណោះស្រាយវិបត្តិរ៉ាំរ៉ៃនៅស៊ីរី
នេះជាលទ្ធផលនៃជំនួបរវាងប្រមុខ ការទូតរុស្ស៊ីលោក Serguei Lavrov និងសមភាគីអាមេរិកលោក John Kerry ដែលបានពន្យារទៅល្ងាចម្សិលមិញ អស់២ម៉ោងជាប់ នៅឯស្ថានទូតរុស្ស៊ីក្នុងក្រុងប៊ែរឡាំង។ គោលជំហររួមនេះ គឺនៅត្រង់ម្ខាងៗ ប្រើឥទ្ធិពលខ្លួន បញ្ចុះបញ្ចូលយ៉ាងណា លុះទាល់តែរដ្ឋាភិបាលក្រុងដាម៉ាស និងភាគីប្រឆាំងនៅស៊ីរីសុខចិត្តអង្គុយចរចានឹងគ្នាទៅ។
ក្រោយពីជំនួបក្នុងស្ថានទូតរុស្ស៊ីនៅក្រុងប៊ែរឡាំងចប់ទៅពេល យប់ទៅហើយ លោករដ្ឋមន្ត្រីការបរទេសរុស្ស៊ី Serguei Lavrov បានថ្លែងជាអាទ៍ទៅពួកអ្នកកាសែត ទោះបីម៉ូស្គូ និងវ៉ាស៊ីនតោនមានទស្សនៈយល់ឃើញខុសគ្នា ចំពោះអនាគតនៃរបបលោកប្រធានាធិបតី Bachar Assad ក្តី ក៏លើកនេះ រុស្ស៊ី និងស.រ.អា. បានបញ្ជាក់ពីគោលជំហរដូចគ្នាជុំវិញបញ្ហាស៊ីរី ដែលខ្លឹមសារវា គឺនៅត្រង់រដ្ឋអំណាចស៊ីរី និងភាគីប្រឆាំងត្រូវតែចរចាគ្នាដើម្បីដោះស្រាយវាសនាប្រទេសជាតិ ដោយខ្លួនគេផ្ទាល់ទៅ។
ប្រាកដណាស់ ដែលមិនមែនរឿងទាំងអស់ អាស្រ័យនឹងម៉ូស្គូ និងវ៉ាស៊ីនតោនឡើយ ប៉ុន្តែអ្វី ដែលអាស្រ័យនឹងយើង នោះយើងនឹងធ្វើសព្វបែបយ៉ាងដើម្បីបង្កលក្ខណៈសម្រាប់ជម្រុញដល់ ការចាប់ផ្តើមឲ្យបានឆាប់ឡើង សំវាទរវាងរដ្ឋាភិបាល និងភាគីប្រឆាំងនៅស៊ីរី។ តាមមតិរុស្ស៊ី និងស.រ.អា. ការបន្តទៅនៃអំពើហិង្សាក្នុងប្រទេសស៊ីរី ដែលឆាបឆេះដោយសង្គ្រាមស៊ីវិល គឺជាការមិនអាចទទួលយកបានសោះឡើយ។
ព្រមជាមួយនេះ លោកប្រមុខការទូតរុស្ស៊ីកត់សម្គាល់ថា ពួកជ្រុលនិយមក្នុងជួរភាគីប្រឆាំងចេះតែបង្កើតជាឧបសគ្គរាំងរា ដល់ការធ្វើសំវាទជាមួយលោកប្រធានា ធិបតី Bachar Assad តាមផ្លូវរុញច្រានចេញមក នូវការទាមទារជ្រុលហួសដែលមិនអាចបំពេញបានឡើយ។ ក្នុងជំនួបយប់មិញ លោក Lavrov និងលោក Kerry បានពិភាក្សា តើតាមរបៀបណាដែលត្រូវ
បំផុសឲ្យចេញជាការអនុវត្តន៍នូវកិច្ចព្រមព្រៀងចុះក្រុងហ្ស៊ឺណែវកាល ពីថ្ងៃ ទី៣០ មិថុនាឆ្នាំមុន កិច្ចព្រមព្រៀងដែលតាំងគោលដៅ អន្ទងក្រុងដាម៉ាស និងភាគីប្រឆាំងឲ្យចាប់ផ្តើមរៀបចំបង្កើតឡើង ជារដ្ឋាភិបាលអន្តរកាលសម្រាប់ថិរវេលាដែលលោកប្រធានាធិបតី Bachar Assad ដកខ្លួន ចេញពីមុខតំណែងទៅ។
លោក Lavrov ចាត់ទុកជំនួបកន្លងទៅ ជាមួយលោក Kerry ថា ជាជំនួបក្នុងស្មារតីស្ថាបនា។ រីឯអ្នកនាំពាក្យផ្លូវការនៃក្រសួងការបរទេសអាមេរិក លោក ស្រី Victoria Nuland បានហៅជំនួបយប់មិញ រវាងលោកប្រមុខការទូតអាមេរិកាំង និងសមភាគីរុស្ស៊ីថា ជាជំនួបការងារដ៏មធ្យ័តដោយលំអិតថា ពីក្នុងរយៈពេល២ម៉ោងនៃជំនួប គូភាគីបានចំណាយពេលអស់ ១ម៉ោងឯណោះដល់ការពិភាក្សាអំពីសង្គ្រាមស៊ីវិលនៅស៊ីរី៕ដោយ កែវ ឆាយា (RFI)
