សមត្ថកិច្ចអូស្ត្រាលីចាប់បានគ្រឿងញៀន៥៨៥គីឡូក្រាមមកពីប្រទេសចិន
មន្រ្តីគយ និង ប៉ូលិសអូស្ត្រាលីបានស្ទាក់រារាំងការនាំចូលគ្រឿងញៀនដ៏ច្រើន សន្ធឹកសន្ធាប់មួយ ដោយចាប់បានគ្រឿងញៀន ដែលគេហៅថាទឹកកកក្នុងចំនួន យ៉ាងច្រើនសម្បើម ។
គ្រឿងញៀនចំនួន៥៨៥គីឡូក្រាម ត្រូវបានគេរកឃើញនៅក្នុងកុងតាណឺរមួយចំនួនដែលផ្ទុកផលិតផល លាងសម្អាត ឋិតនៅក្នុងឃ្លាំងដាក់អីវ៉ាន់មួយកន្លែងនៅភាគខាងលិចនៃក្រុងស៊ីដនីយ៍។ គ្រឿងញៀននេះមានចំនួន២ដងច្រើនជាងចំនួន ដែលអាជ្ញាធរ ចាប់បាននៅគ្រាកន្លងមក ហើយគេជឿជាក់ថា គ្រឿងញៀន នេះមានប្រភពចេញមកពីប៉ែកខាងត្បូងនៃប្រទេសចិន។
អាជ្ញា ធរបានចាប់ខ្លួនបុរស៣នាក់ នៅពេលដែលពួកគេទៅយកកុងតាណឺរទាំង នោះ។ ម្នាក់មកពីសិង្ហបុរី មានអាយុ៣២ឆ្នាំ និងម្នាក់ទៀតមកពីហុងកុង អាយុ៥១ឆ្នាំ ហើយម្នាក់ទៀតមកពីក្រុងស៊ីដនីយ៍ មានអាយុ២១ឆ្នាំ។
ជនទាំង៣នាក់ជាប់ចោទពីបទនាំចូលគ្រឿងញៀនក្នុងបរិមាណជួញដូរ ហើយត្រូវឡើងតុលាការនៅក្នុងថ្ងៃនេះ៕ (Radio Australia)