កម្ពុជាប្រារព្វទិវាសិទ្ធិនារីអន្តរជាតិលើកទី១០១
នៅថ្ងៃទី ៦ មីនា ២០១២នេះ បណ្តាសមាជិករដ្ឋសភា និង មន្រ្តីរដ្ឋាភិបាលកម្ពុជា បានជូបជុំគ្នានៅវិមានរដ្ឋសភាដើម្បីប្រារព្វទិវាសិទ្ធិនារីអន្តរជាតិ និងការប្តេជ្ញាបង្កើនចំនួនស្រ្តីនៅក្នុងស្ថាប័នរដ្ឋក្នុងមុខងារជាថ្នាក់ដឹកនាំ។
លោក ហេង សំរិន ប្រធានរដ្ឋសភា បានថ្លែងនៅក្នុងពិធីទិវាសិទ្ធិនារីអន្តរជាតិលើកទី១០១ ថា រូបលោកផ្ទាល់ ក៏បានចូលរួមគាំទ្រផងដែរ នូវការលើកកម្ពស់តួនាទីស្រ្តី តាមរយៈការផ្តល់ឱ្យស្រ្តីបានចូលរួមក្នុងការធ្វើសេចក្តីសម្រេចចិត្ត ដែលជាចំណែកមួយនៃការដឹកនាំកម្រិតជាតិ ជាពិសេសនៅថ្នាក់មូលដ្ឋាន។
ជាមួយគ្នានោះដែរ លោកស្រី អ៊ឹង កន្ថាផាវី រដ្ឋមន្រ្តីក្រសួងកិច្ចការនារី ក៏បានថ្លែងផងដែរ ដោយសង្កត់ធ្ងន់ទៅលើការពិនិត្យឡើងវិញនូវការអនុវត្តសិទ្ធិជីវភាពរស់នៅ គម្លាតរវាងស្រ្តី និង បុរស និងបញ្ហាប្រឈមមុខផ្សេងៗទៀត ដើម្បីបន្តជំរុញលើកកម្ពស់តួនាទីរបស់ស្រ្តីឲ្យកាន់តែប្រសើរថែមទៀត៕
