ស្រវឹងបើកម៉ូតូ ទៅបុករថយន្តបណ្ដាលឲ្យអ្នកជិះម៉ូតូរងរបួសធ្ងន់
ភ្នំពេញ៖ កាលពីវេលាម៉ោង ៩ និង ៤៥នាទីយប់ថ្ងៃទី ២៦ ខែកុម្ភៈ បុរស ២នាក់បានរងរបួសធ្ងន់បន្ទាប់ពីជិះម៉ូតូ ទៅបុកជាមួយនឹងរថយន្ត ដែលបើកបរ បញ្ច្រាសទិសគ្នា នៅចំណុចខាងផ្ទះលេខ៤៩៦ តាមបណ្ដោយផ្លូវលេខ២៧១ ស្ថិតក្នុង សង្កាត់ផ្សាដើមថ្កូវ ខណ្ឌចំការមន។
មុនពេលកើតហេតុ គេឃើញ បុរសរងគ្រោះខាងលើ ជិះម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខ ភ្នំពេញ 1Z- 9377 បើកបរតាមបណ្ដោយផ្លូវលេខ២៧១ ក្នុងទិសដៅពីកើតទៅលិច ដោយបើកបរក្នុង អាការៈស្រវឹងស្រា លុះមកដល់ចំណុចកើតហេតុ ក៏រេចង្កូតទៅបុកជាមួយនឹងរថយន្តបាញ់ស៊ី ម៉ងដ៏ មួយគ្រឿងម៉ាកហ៊ីណូ ពណ៌បៃតង ពាក់ស្លាកលេខ ភ្នំពេញ 5A-0164 ដែលបើកបរ បញ្ច្រាស់ទិសនឹងម៉ូតូ បណ្ដាលឲ្យបុរស ២នាក់រងរបួសធ្ងន់ ត្រូវបានរថយន្តសាមុយដឹកយក ទៅសង្គ្រោះនៅឯមន្ទីរពេទ្យ រីឯអ្នកបើកបររថយន្តបានរត់គេចខ្លួនបាត់ ។
បច្ចុប្បន្ន រថយន្ត និងម៉ូតូ ត្រូវបានសមត្ថកិច្ចយកទៅកាន់ការិយាល័យនគរបាលចរាចរ ជើងគោករាជធានីភ្នំពេញ ដើម្បីធ្វើការដោះស្រាយនាពេលក្រោយ ៕ ហេង នាង
