តាក់ស៊ីបើកបុករបាំងថ្មចែកទ្រូងផ្លូវបាក់អស់ ៣កង់
ភ្នំពេញ៖ កាលពីវេលាម៉ោង៤ និង ១០ នាទីទៀបភ្លឺថ្ងៃទី ២៧ ខែកុម្ភៈ របាំងថ្ម ចែកទ្រូងផ្លូវជាច្រើនកង់ នៅតាមបណ្ដោយព្រះមុនីវង្ស ក្នុងសង្កាត់បឹងត្របែក ខណ្ឌចំការមន ត្រូវបាក់បែកខ្ទេចខ្ទីរាយបាយពេញផ្លូវ ក្នុងខណៈដែលបុរសម្នាក់ទំនង់ជាងងុយដេកបានបើករថយន្តតាក់ស៊ីមួយគ្រឿង រេចង្កូតបុករៈ។
មុនពេលកើតហេតុ គេសង្កេតឃើញ បុរស ម្នាក់ឈ្មោះ គា អាយុ ៣០ ឆ្នាំ បានបើកបររថយន្តមួយគ្រឿង ម៉ាក DAMAS ពណ៌លឿង ពាក់ស្លាកលេខ ភ្នំពេញ 2S-4437 បើកបរតាមបណ្ដោយមហាវិថីព្រះមុនីវង្ស ក្នុងទិសដៅពីត្បូងទៅជើងដោយបានបើកយ៉ាងលឿន លុះមកដល់ចំណុចកើតហេតុ ស្រាប់តែរថយន្តDAMAS ខាងលើនេះ រេចង្កូតមកខាងឆ្វេងដៃ បុករះរបាំងថ្មចែកទ្រូងផ្លូវបាក់ខ្ទាត ពេញផ្លូវ សរុបចំនួន ៣កង់ ចំណែកឯរថយន្តត្រូវរងការខូចខាតផ្នែកខាងមុខទាំងស្រុង ចំណែកអ្នកបើកបរថយន្តបង្កហេតុ រងរបួសធ្ងន់ធ្ងរ បានបញ្ជូនទៅសង្គ្រោះនៅមន្ទីរពេទ្យ ។
បន្ទាប់ពីធ្វើការត្រួតពិនិត្យនិងវាស់វែង ពីសំណាក់សមត្ថកិច្ចជំនាញ រថយន្តបង្កហេតុត្រូវបានសមត្ថកិច្ចជំនាញនាំទៅកាន់សាលារាជធានី ភ្នំពេញ ដើម្បីធ្វើការទូរទាត់ សំណងថ្លៃខូចខាតចូលរដ្ឋ៕ ហេង នាង
