ស្រវឹងស្រាបើករថយន្តបុកម៉ូតូបណ្តាលឲ្យបុរសម្នាក់រងរបួសធ្ងន់
ភ្នំពេញ ៖ កាលពីវេលាម៉ោង១៨ នឹង ៤០ នាទីយប់ថ្ងៃទី ២៦ ខែកុម្ភៈ មន្ត្រីយោធាម្នាក់ បើករថយន្តបុកបុរសម្នាក់កំពុងជិះម៉ូតូបណ្តាលឲ្យរងរបួសធ្ងន់ធ្ងរនៅចំណុច ខាងត្បូងសាលាខណ្ឌដង្កោ ជាង ១០០ ម៉ែត្រ តាមបណ្តោយផ្លូវចំការដូងសង្កាត់ ដង្កោ ខណ្ឌដង្កោ។
មុនពេលកើតហេតុគេសង្កេតឃើញបុរសម្នាក់ជិះម៉ូតូសងកូរ៉េ មួយគ្រឿង ពណ៌ក្រហម ជិះតាមបណ្តោយផ្លូវចំការដូងក្នុងទិសដៅពីត្បូងទៅជើង ខណៈជិះមកដល់ចំណុចកើតហេតុស្រាប់តែមានបុរសម្នាក់ទៀតស្ថិតក្នុង ស្ថានភាពស្រវឹងស្រាជោគខ្លួនតែម្តង បានបើករថយន្តឡង់គ្រឺស័រ ពណ៌ស ពាក់ស្លាកលេខ កណ្តាល 2A 6048 ក្នុងទិសដៅច្រាសទិសគ្នាជាមួយម៉ូតូ ពេលនោះភាគីរថយន្តស្រាប់តែរេចង្កូតចូលទៅចំណីផ្លូវម៉ូតូហើយបុក ម៉ូតូពេញទំហឹង បណ្តាលឲ្យបុរសជាម្ចាស់ម៉ូតូត្រូវបោកក្បាលនិងរថយន្តរងរបួសធ្ងន់ធ្ងរ បញ្ជូនទៅសង្គ្រោះនៅមន្ទីរពេទ្យភ្លាមៗ។
ក្រោយពីកើតហេតុភាគីរថយន្តបង្កហេតុបានព្យាយាមបើករត់គេច ខណះនោះសមត្ថកិច្ចអន្តរាគមន៍ខណ្ឌដង្កោ បានសហការជាមួយប៉ូលិសមូលដ្ឋានចុះទៅដេញចាប់រថយន្ត នៅចំណុចរង្វង់ដីក្រហម សង្កាត់រលួស ខណ្ឌដង្កោ។
បន្ទាប់ពីចាប់នឹងឃាត់រថយន្តបាននោះសមត្ថកិច្ចបាននាំខ្លួនបុរសជា ម្ចាស់រថយន្តនិងបើករថយន្តបង្កហេតុមកទុកនៅអធិការដ្ឋាននគរបាល ខណ្ឌដង្កោដើម្បីធ្វើសាកសួរនិងដោះស្រាយតាមផ្លូវច្បាប់ ។
អ្នកបើកបររថយន្តបង្កហេតុមានឈ្មោះ ទេព សារី អាយុ ៥២ ឆ្នាំមានមុខរបរជា កងកម្លាំងយោធា ស្នាក់នៅផ្ទះ ក្នុងសង្កាត់ រលួសខណ្ឌដង្កោ ។ចំណែកអ្នករងរបួសឈ្មោះ ជួន តុន អាយុ ៣៦ ឆ្នាំ ស្នាក់នៅជិតចំណុចកើតហេតុ ៕ ហេង នាង
