កូរ៉េខាងជើងគំរាមកម្ទេចកងទ័ពអាមេរិកបើហ៊ានធ្វើសមយុទ្ធនៅកូរ៉េខាងត្បូង
ជិតមួយសប្តាហ៍ មុនពេលកងទ័ពអាមេរិក និងកូរ៉េខាងត្បូងបើកធ្វើសមយុទ្ធទ្រង់ ទ្រាយធំ ប្រចាំឆ្នាំ ដែលនឹងត្រូវធ្វើរយៈពេល ២ខែ ពីខែមីនា ដល់ខែមេសា កូរ៉េខាងជើងបានប្រកាសគំរាម កាលពីថ្ងៃសៅរ៍ម្សិលមិញថា “នឹងកម្ទេចកងទ័ពអាមេរិក” ប្រសិនបើពួកគេហ៊ានចូលរួមធ្វើសមយុទ្ធជាមួយកូរ៉េខាងត្បូងនេះមែន។ ក្នុងពេលជាមួយគ្នានេះ បណ្តាញសារព័ត៌មានអាមេរិកបានចុះផ្សាយថា មន្រ្តីរដ្ឋាភិបាលអាមេរិកធ្លាប់បានធ្វើដំណើរដោយសម្ងាត់ទៅកាន់កូរ៉េ ខាងជើង ដល់ទៅ ២លើក ដើម្បីព្យាយាមសម្រុះសម្រួលទំនាក់ទំនងជាមួយរបបកុម្មុយនិស្តព្យុងយ៉ាង។
យោងតាម ការចុះផ្សាយ កាលពីថ្ងៃសៅរ៍ម្សិលមិញ របស់កាសែត The Los Angeles Times មន្រ្តីរដ្ឋាភិបាលអាមេរិកធ្លាប់បានធ្វើដំណើរទៅបំពេញទស្សន កិច្ចដោយ សម្ងាត់ នៅក្នុងប្រទេសកូរ៉េខាងជើង ដល់ទៅ ២លើក កាលពីឆ្នាំ២០១២កន្លងទៅ។ លើកទី១ នៅខែមេសា និងលើកទី២ នៅខែសីហា។ គណៈប្រតិ ភូនៅក្នុងដំណើរទស្សនកិច្ចនេះ ដឹកនាំដោយមន្រ្តីជាន់ខ្ពស់នៃក្រសួងចារ កិច្ចអាមេរិក។
កាសែត The Los Angeles Times បានដកស្រង់សម្តីមន្រ្តីជាន់ខ្ពស់អាមេរិក ដែលសុំមិនបញ្ចេញឈ្មោះ បញ្ជាក់ថា ដំណើរទស្សនកិច្ចដោយសម្ងាត់ទាំងពីរ លើកនេះ គឺធ្វើឡើង ក្នុងគោលដៅ បញ្ចុះបញ្ចូលលោកគីម ជុងអ៊ុន ឲ្យដាក់ ចេញនូវនយោបាយការបរទេសទន់ភ្លន់ ដើម្បីសម្រុះសម្រួលទំនាក់ទំនងជាមួយអាមេរិក។
ក៏ប៉ុន្តែ បើមើលទៅលើស្ថានភាពដ៏តានតឹង នៅកូរ៉េ ក្នុងពេលបច្ចុប្បន្ននេះ គេអាចសន្និដ្ឋានបានថា ដំណើរទស្សនកិច្ចសម្ងាត់របស់មន្រ្តីចារកិច្ចអាមេរិក នៅកូរ៉េខាងជើង កាលពីឆ្នាំទៅមិញនេះ ប្រហែលជាមិនទទួលបានលទ្ធផលអ្វីនោះទេ។ គេឃើញថា លោកគីម ជុងអ៊ុន មេដឹកនាំវ័យក្មេង ដែលបានស្នង តំណែង ពីឪពុក នៅតែបន្តអនុវត្តនយោបាយតឹងរ៉ឹងចំពោះកូរ៉េខាងត្បូង និងសហរដ្ឋអាមេរិក។
ក្រោមការដឹកនាំរបស់លោកគីម ជុងអ៊ុន កូរ៉េខាងជើងបានបាញ់សាកល្បងប្រកប ដោយជោគជ័យនូវរ៉ុកកែតផ្ទុក ផ្កាយរណប កាលពីខែធ្នូ ឆ្នាំ២០១២។ ការបាញ់សាកល្បងផ្កាយរណប ដែលសហគមម៍អន្តរជាតិយល់ថាជាលេស ដើម្បីសាកល្បងបច្ចេកវិទ្យាមីស៊ីលបាលីស្ទិកអន្តរទ្វីប។ ប្រមាណជាពីរខែក្រោយមកទៀត លោកគីម ជុងអ៊ុន ក៏បានសម្រេចឲ្យធ្វើការសាកល្បងអាវុធនុយក្លេអ៊ែរក្រោមដីម្តងទៀត។ គឺជាការសាកល្បងលើកទី៣ ហើយដែលអ្នកជំនាញភាគច្រើនយល់ថា ជាការសាកល្បងប្រកបដោយជោគជ័យមួយ។
ចាប់ពីពេលនោះមក គេឃើញថា កូរ៉េខាងជើងចេះតែបន្តគំរាមស្ទើរតែរៀងរាល់ថ្ងៃ ចង់ប្រើកម្លាំង វាយប្រហារទៅលើកូរ៉េខាងត្បូង។ កាលពីថ្ងៃសៅរ៍ម្សិលមិញនេះ កូរ៉េខាងជើងក៏បានបន្តគំរាមទៅដល់អាមេរិកបន្ថែមទៀត គឺគំរាមថានឹងកម្ទេចកងទ័ពអាមេរិក ប្រសិនបើពួកគេហ៊ានចូលរួមធ្វើសមយុទ្ធជាមួយនឹងកងទ័ពកូរ៉េខាងត្បូង នៅខែក្រោយនេះ។
គួរបញ្ជាក់ឡើងវិញថា បច្ចុប្បន្ននេះ អាមេរិកមានកងទ័ពចំនួនជាង ២ម៉ឺន ៨ពាន់នាក់ ដែលកំពុងឈរជើងជាអចិន្រ្តៃយ៍ នៅក្នុងប្រទេសកូរ៉េខាងត្បូង។ ទាហានអាមេរិកប្រមាណជា ១ម៉ឺននាក់ នឹងត្រូវចូលរួមធ្វើសមយុទ្ធទ្រង់ទ្រាយធំមួយ ជាមួយកងទ័ពកូរ៉េខាងត្បូង ដែលចាប់ផ្តើមធ្វើពីថ្ងៃទី១មីនា រហូតដល់ថ្ងៃទី៣០មេសា។
សមយុទ្ធរួមគ្នា រយៈពេល ២ខែនេះ គឺជាសមយុទ្ធ ដែលកងទ័ពអាមេរិក និងកងទ័ពកូរ៉េខាងត្បូងតែងតែរៀបចំធ្វើជារៀងរាល់ឆ្នាំ ហើយដែលរបបដឹកនាំក្រុងព្យុង យ៉ាងតែងតែចាត់ទុកថាជាការសមជើងគ្នា ត្រៀមវាយលុកឈ្លានពានចូលក្នុងទឹកដីកូរ៉េខាងជើង៕ដោយ សេង ឌីណា (RFI)