ជិះម៉ូតូគេចពីម៉ូតូជ្រុលទៅបុកគូទរថយន្តដួលសន្លប់ស្តូកស្តឹង
ភ្នំពេញ៖ កាលពីវេលាម៉ោង ១០និង៤៥នាទីព្រឹក ថ្ងៃទី២៦ ខែកុម្ភៈ ពីរនាក់បងប្អូនជិះម៉ូតូឌុបគ្នា ហើយបានគេចពីម៉ូតូមួយគ្រឿង ជ្រុលទៅបុកគូទរថយន្តពេញទំហឹង បណ្ដាលឲ្យនារីត្រូវជាបងស្រីយុវជនអ្នកឌុប សន្លប់ស្ដូកស្ដឹង ស្ថិតនៅតាមបណ្ដោយមហាវិថីព្រះមុនីវង្ស សង្កាត់ចតុមុខ ខណ្ឌដូនពេញ។
ពីរនាក់បងប្អូនដែលរងគ្រោះខាងលើនេះ នៅមិនទាន់ស្គាល់អត្តសញ្ញាណនៅឡើយទេ។ ពួកគេជិះម៉ូតូម៉ាកគុបជ្រុក ពណ៌ទឹកប៊ិច ជិះតាមបណ្ដោយមហាវិថីព្រះមុនីវង្ស ក្នុងទិសដៅពីជើងទៅត្បូង ដោយបានបើកពីក្រោយរថយន្តមួយគ្រឿងទៀតម៉ាក ហ្វ័ររ៉េនន័រ ពណ៌ខ្មៅ ពាក់ស្លាកលេខ ភ្នំពេញ 2I-2871 ខណៈមកដល់ចំណុចកើតហេតុខាងលើ ដោយសារតែជនរងគ្រោះជិះលឿន វ៉ាម៉ូតូមួយគ្រឿងទៀត ក៏ជ្រុលល្បឿនបុកចំគូទរថយន្ត ពីក្រោយពេញទំហឹង បណ្ដាលឲ្យនារីជាអ្នកជិះពីក្រោយ ដួលបោកក្បាលទៅនឹងថ្នល់សន្លប់ស្ដូកស្ដឹង។
ក្រោយពេលកើតហេតុ ភាគីរថយន្តមិនបានទាមទារសំណងពីភាគីម៉ូតូដែលបើកបុកគូទរថយន្ត ពីក្រោយនោះទេ ដោយភាគីទាំងសងខាង បានសម្រេចយករថយន្តនិងម៉ូតូទៅជួសជុលរៀងៗខ្លួន ចំណែកនារីរងគ្រោះត្រូវបានប្រជាពលរដ្ឋជួយធ្វើចលនា ហើយបានដឹងខ្លួនឡើងវិញ៕ ហេង នាង
