បុរសម្នាក់ត្រូវរថយន្ដដឹកអំបិលកិនខ្ទេចក្បាលស្លាប់
ភ្នំពេញ ៖ កាលពីវេលាម៉ោង៥និង៥០នាទីព្រលឹម ថ្ងៃទី២៦ ខែកុម្ភៈ កម្មករលីអំបិលម្នាក់ធ្លាក់ពីលើរថយន្ដ ចូលក្រោមកង់ក្រោយកិនខ្ទេចក្បាល ស្លាប់ភ្លាមៗនៅកន្លែងកើតហេតុ ស្ថិតនៅចំណុចគល់ស្ពានព្រះមុនីវង្សចាស់ផ្នែកខាងកើត ក្នុងសង្កាត់ច្បារអំពៅទី២ ខណ្ឌមានជ័យ ។
ជនរងគ្រោះមានឈ្មោះ សារ៉េត ភេទប្រុស អាយុ៣២ឆ្នាំ មានស្រុកកំណើតឃុំព្រៃផ្គាំ ស្រុកអង្គរបុរី ខេត្ដ តាកែវ ។ រថយន្ដបង្កប្រភេទហ៊ីយ៉ាន់ដាយ ពណ៌សលាយក្រហម ពាក់ស្លាកលេខភ្នំពេញ ៣B-៥៥៦០ បើកបរដោយឈ្មោះ បៀម ដា ភេទប្រុស អាយុ៣០ឆ្នាំ មានស្រុកកំណើតភូមិព្រែកភ្លើង ឃុំវិហារសួគ៌ ស្រុកខ្សាច់ កណ្ដាល ខេត្ដកណ្ដាល ។
មុនពេលកើតហេតុរថយន្ដដឹកអំបិលចេញពីក្រុងតាខ្មៅ ឆ្ពោះមកភ្នំពេញ មកដល់ស្ពានព្រះមុនីវង្សរថយន្ដក៏បត់ឡើងតាមស្ពានថ្មីដើម្បីឡើង តាមស្ពានចាស់ ។ ពេលបើកដល់ចំណុចផ្លូវកោង រថយន្ដក៏បើកចាក់គួរ បណ្ដាលឱ្យជនរងគ្រោះដែលជិះនៅលើរថយន្ដធ្លាក់ចូល ក្រោមកង់រថយន្ដ បណ្ដាលឱ្យកិនខ្ទេចក្បាលស្លាប់ភ្លាមៗតែម្ដង ។
បច្ចុប្បន្ន ទាំងរថយន្ដនិងអ្នកបើកបរ ត្រូវបាននគរបាលនាំមកកាន់ការិយាល័យនគរបាលចរាចរជើងគោករាជធានី ភ្នំពេញ ដើម្បីដោះស្រាយតាមច្បាប់ ៕ ហេង នាង
