សមត្ថកិច្ចបង្ក្រាបបាន ក្រុមចោរប្លន់ ២នាក់
ភ្នំពេញ៖ កាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី២៦ ខែកុម្ភៈ ក្រុមចោរមួយក្រុមបានចូល ធ្វើសកម្មភាពភ្ជង់និងវាយ ប្លន់សន្តិសុខ និងអ្នកបើកបររថយន្តរបស់ក្រុមហ៊ុនមិត្តហ្វូនបណ្ដាលឲ្យរងរបួស ស្ថិតនៅសាខាក្រុមហ៊ុនមិតហ្វូន ផ្លូវជាតិលេខ៥ ភូមិកណ្ដាល សង្កាត់ព្រែកព្នៅ ខណ្ឌសែនសុខ រួចបើករថយន្តគេចខ្លួនប្រមាណ១គីឡូម៉ែត្រ ក៏ត្រូវសមត្ថកិច្ចស្ទាក់ចាប់បាន ២នាក់។
ជនរងគ្រោះដែលត្រូវក្រុមចោរវាយ នឹងស្នាប់កាំភ្លើងបណ្ដាលឲ្យរងរបួសមាន១-ឈ្មោះភិន ភៀប ភេទប្រុស អាយុ៤០ឆ្នាំ ជាសន្តិសុខក្រុមហ៊ុនមិត្តហ្វូន មានស្រុកកំណើតភូមិពោធិ៍មង្គល ឃុំឈ្វាង ស្រុកពញាឮ ខេត្តកណ្ដាល រងរបួសបែកក្បាល២កន្លែង ដោយសារក្រុមចោរវាយនឹងស្នាប់កាំភ្លើង និង២-ឈ្មោះខេន សុភារិទ្ធ ភេទប្រុស អាយុ ៣០ឆ្នាំ ជាអ្នកបើកបររថយន្តឲ្យក្រុមហ៊ុនមិត្តហ្វូននិងស្នាក់នៅក្នុង ក្រុមហ៊ុន មានស្រុកកំណើតនៅភូមិស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្ដាល រងរបួសដោយក្រុមចោរយកដំបងឆក់។
រថយន្តដែលត្រូវក្រុមចោរប្លន់យក ហើយបើកគេចបានប្រមាណ១០០ម៉ែត្រនោះម៉ាកហ្វត២បាំងកន្លះ ពណ៌ស ពាក់ស្លាកលេខ ភ្នំពេញ 2L-0282 ប៉ុន្តែត្រូវសមត្ថកិច្ចស្ទាក់បង្ក្រាបបានទាន់ពេល។
មុនពេលកើតហេតុគាត់កំពុងឈរយាមនៅមុខក្រុមហ៊ុនមិត្តហ្វូន ក៏ស្រាប់តែមានបុរសម្នាក់ជាក្រុមចោរប្លន់បានដើរតម្រង់មកគាត់ហើយ ចាប់ក្រៀកដោយយកកាំភ្លើងភ្ជង់ រួចក៏វាយ នឹងស្នាប់កាំភ្លើងឲ្យរងរបួសហើយរុញគាត់ឲ្យចូលក្នុងស្នាក់ការ ក្រុមហ៊ុនសួររកលុយ។ ពេលនោះបក្ខពួកវាម្នាក់ ទៀតក៏រត់ចុះមកតាមក្រោយចូលទៅវាយអ្នកបើកបរ។
ជនរងគ្រោះបន្តថា ពេលនោះខ្លួនបានឆ្លើយថា មិនមាន លុយទេ ហើយក្រុមចោរក៏សួររកកូនសោឡាន ជនរងគ្រោះក៏ប្រគល់កូនសោឡានឲ្យក្រុមចោរ ហើយពួកគេក៏ដើរ ចេញមកខាងក្រៅដោយបិទទ្វារពីខាងក្រៅ រួចក៏បើករថយន្តជិះចេញទៅបានប្រមាណ១០០ម៉ែត្រក៏ត្រូវសមត្ថកិច្ច ស្ទាក់ចាប់ តែពួកក្រុមចោរក៏ទុករថយន្តចោលហើយរត់ឡើងទៅជិះម៉ូតូរបស់បក្ខពួក គេដែលមានគ្នាពី៥ទៅ៧នាក់ ជិះម៉ូតូតាមពីក្រោយគេចខ្លួនបាត់ ដោយសមត្ថកិច្ចឃាត់ខ្លួនបានជនសង្ស័យ២នាក់យកទៅសាកសួរ។
បច្ចុប្បន្នជនសង្ស័យត្រូវបានឃុំខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងចាត់ការតាម ផ្លូវច្បាប់៕ ហេង នាង
