យុវជនពីរនាក់ជិះម៉ូតូទៅបុករថយន្តបណ្តាលឲ្យបាក់ជើងម្នាក់
ភ្នំពេញ៖ កាលពីរាត្រី ថ្ងៃទី០២ មករា ២០១២ វេលាម៉ោង ៧:៣០ នាទី យុវជនពីរនាក់បានបើកម៉ូតូយ៉ាងលឿនទៅបុករថយន្ត ១ គ្រឿងពេញទំហឹង បណ្តាលរងរបួសធ្ងន់បាក់ជើង ខាងស្តាំម្ខាង និងម្នាក់ទៀតបានរងរបួសស្រាល ស្ថិតនៅមុខផ្សារហេងលីផ្លូវ២៧១ សង្កាត់ទឹកល្អក់ ទី៣ ខណ្ឌទួលគោក។
ម៉ូតូបង្កហេតុម៉ាកគ្លីក ពណ៌ក្រហម ពាក់ស្លាកលេខ ភ្នំពេញ 1A G6359 បើកបរ ដោយយុវជនម្នាក់ឈ្មោះ ជន សម្បត្តិ អាយុ ១៨ ឆ្នាំ ស្នាក់នៅស្រុកច្បារមន ខេត្តកំពង់ស្ពឺ បានរងរបួសបាក់ជើងខាងស្តាំម្ខាង ហើយ ក៏ត្រូវបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យឯកជនភ្លាម ដែរ។ ដោយឡែក យុវជនម្នាក់ទៀតដែលរួមដំណើរជាមួយ រងរបួសស្រាល។
ចំណែលរថយន្តម៉ាកកូរ៉ូឡា ពណ៌ខ្មៅ ពាក់ស្លាកលេខ ភ្នំពេញ 2N 3146 បើកបរ ដោយបុរសម្នាក់ឈ្មោះ រស់ សុគន្ធី ភេទស្រី អាយុ ៣២ ឆ្នាំ មុខរបរជាគ្រូបង្រៀននៅសាកលវិទ្យាល័យភូមិន្ទភ្នំពេញ ស្នាក់នៅក្នុង សង្កាត់ទឹកល្អក់ទី៣ ខណ្ឌទួលគោក។
ប្រភពព័ត៌មានពីកន្លែងកើតហេតុ បានអោយដឹងថា នៅមុនពេលកើតហេតុគេបានឃើញ ម៉ូតូម៉ាកកគ្លីកខាងលើ បានជិះឌុបគ្នា ២ នាក់ តាមបណ្តោយផ្លូវ ២៧១ ក្នុងទិសដៅពីជើងមកត្បូងក្នុងល្បឿនលឿន។លុះបើកបរ មកដល់ចំណុចកើតហេតុ ម៉ូតូបានបើកវ៉ាជាមួយរថយន្ត ១ គ្រឿង ដែលបើកបរស្របទិសគ្នា តែដោយមិនមានការប្រុងប្រយត្ន័ ទើបធ្វើអោយម៉ូតូបោលទៅបុករថយន្តកូរ៉ូឡា ដែលបើកបរក្នុងទិសដៅច្រាសផ្លូវពេញទំហឹងតែម្តង។
ក្រោយហេតុការណ៍ ភាគីម៉ូតូទោះបីបាក់ជើងក៏ដោយ ក៏សុខចិត្តទទួលកំហុសរបស់ខ្លួន ព្រមទាំងសងការខូចខាតទៅលើរថយន្តចំនួន ១២០ ដុល្លារ ដើម្បីបញ្ចប់រឿងនៅកន្លែងកើតហេតុ៕
ដោយ៖ ហេង នាង
