ចុះបើព្យុងយ៉ាងក្លាយជាផ្សារលក់នុយក្លេអ៊ែរ ?!
ម្តងហើយម្តងទៀត កូរ៉េខាងជើងបានគំរាមកំហែងខ្លាំងកូរ៉េខាងត្បូងជាបងប្អូនបង្កើត គូសត្រូវនឹងគ្នាមិនឱ្យលូកដៃ ជាមួយនឹងសហគមន៍អន្តរជាតិក្នុងការដាក់សម្ពាធ ឬគាំទ្រអនុម័តសេចក្តីសម្រេចចិត្តរបស់អង្គការប្រជាជាតិដាក់ ទណ្ឌកម្មប្រឆាំងនឹងកម្មវិធីនុយក្លេ អ៊ែរកូរ៉េខាងជើង។ កម្មវិធីនុយក្លេអ៊ែរ ដែលទំហំនៃការគំរាមកំហែងពិភពលោក ស្ថិតនៅជាចំណុចពិភាក្សាគ្នានៅឡើយទេ ចំពោះអ្នកឯកទេស។ ប៉ុន្តែគ្រប់គ្នាសុទ្ធតែព្រមព្រៀង និងយល់ស្របគ្នាថា ពិភពលោកកំពុងប្រឈមនឹងគ្រោះថ្នាក់នៃការរីកសាយភាពនុយ ក្លេអ៊ែរ។
មាន សំណួរច្រើន តែគ្មានចម្លើយនៅឡើយទេ ក្រោយការបាញ់សាកល្បងនុយក្លេអ៊ែរលើកទីបី ប្រកបដោយជោគជ័យ របស់កូរ៉េខាងជើង។ កូរ៉េខាងត្បូង ជប៉ុន ព្រមទាំងសហរដ្ឋអាមេរិក នៅតែពុំទាន់អាចប្រមូលបានកម្ទេចសំណល់វិទ្យុសកម្មនៃគ្រាប់ នុយក្លេ អ៊ែរកូរ៉េខាងជើង បាញ់កាលពីថ្ងៃទី១២កុម្ភៈ ដើម្បីធ្វើវិភាគបានថា ជាគ្រាប់ផលិតដោយសារធាតុអ៊ុយរ៉ានីញ៉ូម ឬផ្លុយតូនីញ៉ូម។ ប៉ុន្តែដោយហេតុថាកម្លាំងផ្ទុះមានកំរិតខ្លាំង អ្នកជំនាញជាច្រើនសន្មត់ថា ព្យុងយ៉ាងទំនងជាសម្រេចបានជាលើកទីមួយ ការប្រើធាតុអ៊ុយរ៉ានីញ៉ូម។
ដូច្នេះហើយបានជារហូតមកទល់នឹងពេលអ្នកឯកទេសមិនទាន់ចុះសម្រុង គ្នានៅឡើយអំពីទំហំ និងពេលវេលានៃការគំរាមកំហែងនុយក្លេអ៊ែរកូរ៉េខាងជើង។ ប៉ុន្តែទាំងអស់គ្នាយល់ថា គ្រោះថ្នាក់នៃការរីកសាយភាយនុយក្លេអ៊ែរកំពុងកើតមាន ៖
ព្យុងយ៉ាងមាននុយក្លេអ៊ែរ មានអាវុធមីស៊ីល បាលីស្ទិក នឹងរុញច្រានប្រទេសក្នុងតំបន់ឱ្យបោះបង់ចោលដកខ្លួនចេញពី សន្ធិសញ្ញាប្រទេសគ្មានអាវុធនុយក្លេអ៊ែរ ដោយចាប់ផ្តើមមុនដំបូងគេបង្អស់គឺកូរ៉េខាងត្បូង។
ការព្រួយបារម្ភមានកាន់ខ្លាំងថែមទៀតនោះ គឺខ្លាចកូរ៉េខាងជើងក្លាយទៅជាទីផ្សារលក់ សារធាតុអ៊ុយរ៉ានីញ៉ូមចម្រាញ់រួច លក់បច្ចេកវិទ្យាគ្រាប់នុយក្លេអ៊ែរ ឬលក់គ្រាប់នុយក្លេអ៊ែរតែម្តង ដែលអាចអនុញ្ញាតឱ្យរដ្ឋមួយ ឬក្រុមភេវនិយម ទិញដូរតាមតម្រូវការ និងដោយសេរី។ សម្រាប់អាមេរិក ភេរវកម្មនុយក្លេអ៊ែរជាបញ្ហាដ៏គួរឱ្យខ្វល់ខ្វាយបំផុត។ នេះបើយោងតាមការប្រកាសរបស់តំណាងអាមេរិកនៅក្នុងសន្និសីទស្តីពី សុវត្ថិភាព នៅទីក្រុងសេអ៊ូលសប្តាហ៍នេះ។
មិនតែប៉ុណ្ណោះ បើតាមការអ្នកជំនាញមួយចំនួន ព្យុងយ៉ាងទំនងជាមានមជ្ឈមណ្ឌលចម្រើនធាតុអ៊ុយរ៉ានីញ៉ូម យ៉ាងហោចណាស់ក៏មួយដែរ។ អ៊ុយរ៉ានីញ៉ូមចម្រើនធាតុហើយ ងាយស្រួលប្រើប្រាស់សម្រាប់ផលិតជាគ្រាប់ផ្ទុះណាស់។ ប្រសិនបើដូច្នោះមែន នោះកូរ៉េខាងជើងពិតជាអាចរកចំណូលបាន អ៊ីរ៉ង់អតិថិជនដ៏មានសក្តានុពលបំផុត ព្រមទាំងពួកអាល់កៃដាផងនឹងពិតជាចាប់អារម្មណ៍នឹងបច្ចេកវិទ្យា មីស៊ីលនុយក្លេអ៊ែរជាប្រាកដ។ ទោះបីអាជ្ញាធរអ៊ីរ៉ងបដិសេធ តែអ្នកវិភាគជឿជាក់ថា អ្នកឯកទេសអ៊ីរ៉ង់ ទំនងជាមានវត្តមាននៅក្នុងពេលកូរ៉េខាងជើងបាញ់សាកល្បងនុយក្លេអ៊ែរ ក្រោមដីកាលពីថ្ងៃទី១២ កុម្ភៈ៕ដោយ អៀង សុខម៉ិញ (RFI)
