ប្រជាពលរដ្ឋត្រូវមានការប្រុងប្រយ័ត្នខ្ពស់ចំពោះជំងឺ គ្រុនផ្តាសាយបក្សី
ភ្នំពេញ៖ ថ្លែងនៅក្នុងពិធីបរិច្ចាគឈាម របស់និស្សិតនៅសកល វិទ្យាល័យភូមិន្ទកសិកម្ម ចំការដូង នៅថ្ងៃទី២១ កុម្ភៈ ២០១៣ លោក ច័ន្ទ សារុន រដ្ឋមន្ត្រីក្រសួង កសិកម្មរុក្ខាប្រមាញ់ និងនេសាទ បាន អំពាវនាវ ដល់ប្រជាពលរដ្ឋ ទាំងអស់ ឲ្យធ្វើការប្រុងប្រយ័ត្ន ខ្ពស់ចំពោះការ រីករាយដាល នៃជំងឺ ផ្តាសាយបក្សី ដែលទើបតែបានសម្លាប់ ជីវិតមនុស្សអស់ ៧នាក់ នៅដើមឆ្នាំ២០១៣នេះ។
លោក ច័ន្ទ សារុន បានថា នៅរយៈពេលពីរខែដើម ឆ្នាំ២០១៣ ពោលគឺនៅខែមករា និងកុម្ភៈ ជំងឺគ្រុនផ្តាសាយបក្សី បានឆក់យក ជីវតមនុស្ស នៅកម្ពុជាចំនួន៧នាក់ហើយ ដែលក្នុងនោះនៅ ខេត្តកំពង់ស្ពឺ ២នាក់ តាកែវ២នាក់ និងកំពត៣នាក់ ។
លោក ក៏បានថ្លែងអំពីអការៈដែលអាចឲ្យប្រជាពលរដ្ឋសម្គាល់ថា មានកើតជំងឺ ផ្តាសាយបក្សីថា ទី១- ឈឺគ្រុនក្តៅមាន កំដៅ៣៨អង្សាសេ (មិនចុះក្តៅ) ។ ទី២-មានអការៈពិបាកដកដង្ហើម និងទី៣ មុននឹងមានជំងឺ គ្រុនក្តៅ អ្នកជំងឺធ្លាប់បាន ប៉ះពាល់ និងទទួលទានសត្វបក្សី។
ដូច្នេះនៅពេលដែលបងប្អូនប្រជាពលរដ្ឋឃើញអ្នកជំងឺ មានអការៈដូចខាងលើ សូមប្រញាប់ នាំមកកាន់ មន្ទីរពេទ្យ ឲ្យបានឆាប់រហ័ស បំផុតដើម្បីទទួលការព្យាបាល ឲ្យទាន់ពេលវេលា។ លើសពីនេះទៅទៀត នៅពេល ដែលឃើញសត្វបក្សី របស់ខ្លួនងាប់ រាយការណ៍ទៅ មន្ត្រីស្ថាប័នពាក់ ដូចជាមន្ទីរសុខាភិបាល ជាដើម និងចៀស វាងការបរិភោគ សត្វបក្សី ដែលងាប់ទាំងអស់នោះ៕
