បើករថយន្តឡើងចំណោទជ្រុលទៅបុកម៉ូតូរបួសធ្ងន់ម្នាក់
ភ្នំពេញ ៖ កាលពីវេលាម៉ោង១១និង១០នាទី ថ្ងៃទី១៩ ខែកុម្ភៈ មានគ្រោះថ្នាក់ចរាចរកើតឡើងរវាង រថយន្ដ និងម៉ូតូ បណ្ដាលឱ្យយុវជនម្នាក់រងរបួសធ្ងន់ នៅចំណុចកែងរវាងផ្លូវលេខ២៧១និងផ្លូវលេខ៤៣២ ក្នុងសង្កាត់ទួលទំពូង២ ខណ្ឌចំការមន ។
ជនរងគ្រោះមានឈ្មោះ មាស បូរី ភេទប្រុស អាយុ១៨ឆ្នាំ មុខរបរជាងភ្លើង ស្នាក់នៅសង្កាត់បឹងទំពុន ខណ្ឌមានជ័យ របួសធ្ងន់ និងអ្នករួមដំណើរម្នាក់ទៀតអត់ស្គាល់ឈ្មោះ នៅភូមិឫស្សី សង្កាត់-ខណ្ឌមានជ័យ របួសស្រាល ។ ជិះម៉ូតូ១គ្រឿងម៉ាកវីវ៉ា ពណ៌ខ្មៅ ភ្នំពេញ 1AL-9329 ចំណែករថយន្ដម៉ាកតូយ៉ូតា១បាំងកន្លះ ពណ៌ក្រហម ពាក់ស្លាកលេខភ្នំពេញ 2N-6547 ។
មុនពេលកើតហេតុ រថយន្ដបានធ្វើដំណើរតាមបណ្ដោយផ្លូវ លេខ៤៣២ ក្នុងទិសដៅពីកើតទៅលិច លុះមកដល់ចំណុចកែងផ្លូវលេខ២៧១ ក៏បុកជាមួយម៉ូតូជនរងគ្រោះដែល ធ្វើដំណើរតាមបណ្ដោយផ្លូវលេខ២៧១ ក្នុងទិសដៅពីត្បូងទៅជើង បណ្ដាលឱ្យម៉ូតូគាបជាប់ក្រោមរថយន្ដ ធ្វើឱ្យអ្នកបើករងរបួសធ្ងន់ និងអ្នកជិះពីក្រោយរងរបួសស្រាល ។
បច្ចុប្បន្ន រថយន្ដនិងម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋាន នគរបាលខណ្ឌចំការមន ដើម្បីដោះស្រាយតាមនីតិវិធី ៕ ហេង នាង
