ក្រសួងព័ត៌មាន នឹងឃ្លាំមើលសារព័ត៌មានក្នុងស្រុកទាក់ទង នឹងក្រមសីលធម៌
ភ្នំពេញ៖ ក្រសួងព័ត៌មាន និងក្រុមប្រឹក្សា ក្រមសីលធម៌ អ្នកសារព័ត៌មានកម្ពុជា ហៅកាត់ថា ក.ក.អ.ក ចាប់ពី ពេលនេះតទៅ នឹងចាប់ដៃសហការគ្នា ដើម្បីឃ្លាំមើលកាសែត និងទូរទស្សន៍ក្នុងស្រុក មួយចំនួន ទាក់ទងនឹងការ ចុះផ្សាយ គ្មានក្រមសីលធម៌។
លោក ខៀវ កាញារីទ្ធរដ្ឋមន្រ្តី ក្រសួងព័ត៌មានបាន មានប្រសាសន៍ថា ទាក់ទងនឹងបញ្ហាការពង្រឹងចំពោះក្រមសីលធម៌អ្នកសារព័ត៌មាន នេះផងដែរនៅមានអ្នកសារព័ត៌មានជាច្រើន ដែលនៅមិនទាន់គោរព ក្រមសីលធម៌ ចំពោះអាជីព របស់ខ្លួន។
សមាជិកគណៈកម្មាធិការនាយករបស់ ក.ក.អ.ក លោក ពុយ គា បានមានប្រសាសន៍ ក្នុងកម្មវិធី សន្និសីទ មួយស្តី អំពីគម្រោងក្រមសីលធម៌ អ្នកសារព័ត៌មាន កម្ពុជាតាម រយៈការពិនិត្យព័ត៌មាន និងកិច្ច ពិភាក្សាក្រមសីលធម៌ ក្នុង កម្មវិធីទូរទស្សន៍ថា កាសែតក្នុងស្រុកចំនួនប្រាំ មានដូចជាកាសែត កោះសន្តិភាព រស្មីកម្ពុជា នគរវត្ត មនសិការខ្មែរ និងកាសែតកម្ពុជាថ្មី ព្រមទាំងទូរទស្សន៍ ក្នុងស្រុក ទាំងអស់ ក្រៅតែពី ទូរទស្សន៍ទទក (ទូរទស្សន៍ជាតិកម្ពុជា) នឹងមានការឃ្លាំមើល ក្នុងការចាក់ ផ្សាយរបស់ពួកគេ ទាក់ទងនឹងក្រមសីលធម៌ទាំងរូបភាព និងអត្ថបទ៕
