តំណាងរាស្ត្រគណបក្សសមរង្ស៊ីប៉ះរថយន្តគ្នាតិចតួចដកកាំភ្លើងបាញ់គំរាម
ភ្នំពេញ៖ កាលពីវេលាម៉ោង៧និង៥០នាទី យប់ ថ្ងៃទី១៨ ខែកុម្ភៈ បុរសម្នាក់ ត្រូវគេស្គាល់ថាជាតំណាងរាស្ត្រមកពីគណបក្សសមរង្ស៊ីមណ្ឌល កំពង់ចាម បានដកកាំភ្លើងបាញ់ឡើងលើមួយគ្រាប់ គំរាមបុរសម្នាក់ជាមន្ត្រីយោធាគ្រាន់តែរឿងបើករថយន្តប៉ះគ្នា នៅមុខហាងលក់បាយនិងកាហ្វេយីហោ ម៉ាន់លី ស្ថិតក្នុង ភូមិរោងចក្រ សង្កាត់ភ្នំពេញថ្មី ខណ្ឌសែនសុខ។
បុរស ជា តំណាងរាស្ត្រគណបក្សសមរង្ស៊ីមានឈ្មោះនួន វុទ្ធី អាយុ៤០ឆ្នាំ ស្នាក់នៅក្រុមទី៤ ភូមិរោងចក្រ សង្កាត់ ភ្នំពេញថ្មី ខណ្ឌសែនសុខ បើករថយន្តម៉ាកឡង់គ្រីស័រ ពាក់ស្លាកលេខ រដ្ឋសភា៤ ២.០៩៥។ រីឯជនរងគ្រោះ ឈ្មោះហុក សុផាត អាយុ៣៥ឆ្នាំ ជាមន្ត្រីយោធានៅក្រសួងការពារជាតិ ស្នាក់ម្តុំលូ៥ សង្កាត់ចោមចៅ ខណ្ឌពោធិ៍ សែនជ័យ បើករថយន្តម៉ាកអាទូស២នាក់កូនប្រុស ពាក់ស្លាកលេខ ភ្នំពេញ 2N-2171។
មុនពេលកើតហេតុជនរងគ្រោះ បានបើករថយន្តតាមបណ្ដោយផ្លូវលេខ ១៩៨៦ ក្នុងទិសដៅពីកើតទៅលិច។ រីឯរថយន្តរបស់តំណាងរាស្ត្រគណបក្សសមរង្ស៊ីបើករថយន្តបញ្ច្រាសទិស គ្នាពីលិចទៅកើត។ ជនរងគ្រោះបន្តថា រថយន្តមិនដឹងជាប៉ះគ្នាពីកន្លែងណា រថយន្តរបស់លោកតំណាងរាស្ត្រក៏ បើកតាមពីក្រោយរហូតមកដល់ចំណុចកើតហេតុផ្លូវ២៨គ្រួសារ ក៏ដកកាំភ្លើងបាញ់ឡើងលើ បណ្ដាលឲ្យមានការ ភ្ញាក់ផ្អើលតែម្តង។
ភ្លាមៗនោះ សមត្ថកិច្ចបានទៅដល់កន្លែងកើតហេតុដោយនាំខ្លួនភាគីទាំង២នាក់ទៅ អធិការដ្ឋាននគរ បាលខណ្ឌសែនសុខដើម្បីសាកសួរ ដោយអ្នកតំណាងរាស្ត្រមានអភ័យឯកសិទ្ធិជា តំណាងរាស្ត្រសមត្ថកិច្ចក៏មិនបានឃាត់ខ្លួននោះដែរ ហើយភាគី ទាំង២បានបញ្ចប់រឿងភ្លាមៗបន្ទាប់ពីកើតហេតុផងដែរ៕ ហេង នាង
