ម៉ូតូ និងរថយន្ដបុកគ្នាស្លាប់១ របួសធ្ងន់ ២នាក់
ភ្នំពេញ ៖ កាលពីវេលាម៉ោង៤ទៀបភ្លឺ ឈានចូលថ្ងៃទី១៦ ខែកុម្ភៈ ឆ្នាំ២០១៣ ស្ថិតនៅលើបណ្ដោយផ្លូវជាតិលេខ៥ មុខផ្ទះលេខ១៦៨២ សង្កាត់ទួលសង្កែ ខណ្ឌឫស្សីកែវ បុរសម្នាក់បានស្លាប់ភ្លាមៗ នៅនឹងកន្លែងកើតហេតុ និង២នាក់ទៀត បានរងរបួសធ្ងន់ត្រូវបានបញ្ជូនមកកាន់ មន្ទីរពេទ្យកាល់ម៉ែត ខណៈជនរងគ្រោះ ទាំង៣នាក់ជិះម៉ូតូរួមគ្នា ហើយត្រូវបាន រថយន្ដធុនធំបើកបុកចំពីមុខ ។
មុនពេល គ្រោះថ្នាក់គេបានឃើញជនរងគ្រោះបាន ជិះម៉ូតូដឹកគ្នាលើបណ្ដោយផ្លូវជាតិលេខ៥ ក្នុងគោលដៅពីជើងឆ្ពោះមកត្បូង រីឯ រថយន្ដបង្កបានធ្វើដំណើរលើបណ្ដោយ ផ្លូវដូចគ្នាតែក្នុងទិសដៅបញ្ច្រាស ។ លុះ មកដល់ចំណុចកើតហេតុអ្នកបើករថយន្ដ បង្កបានចូលទៅចំណែកនៃយានម្ខាង ប្រហែលជា១ម៉ែត្រក៏ជ្រុលទៅបុកម៉ូតូ ជនរងគ្រោះដែលជិះបញ្ច្រាសគ្នាចំពីមុខ យ៉ាងពេញទំហឹងបណ្ដាលឱ្យអ្នកបើក ស្លាប់ភ្លាមៗនៅកន្លែងកើតហេតុ និង២ នាក់ទៀតខ្ទាតចេញពីម៉ូតូរងរបួសធ្ងន់ ។
រថយន្ដបង្កជាប្រភេទរថយន្ដ CANTER ពណ៌ស ពាក់ស្លាកលេខ ព្រៃវែង 3A-0113 អ្នកបើកបរបានភៀសខ្លួនបាត់ ពីកន្លែងកើតហេតុ ។ ចំណែកជនរងគ្រោះ បានជិះម៉ូតូរួមគ្នាម៉ាកស៊ីធីផ្លាស ពណ៌ ក្រហម គ្មានស្លាកលេខ បើកបរដោយ ឈ្មោះសាយ ដារា អាយុ១៩ឆ្នាំ មានទីលំ នៅភូមិត្រញំងខ្លា ឃុំអង្គតាសោម ស្រុក ត្រាំកក់ ខេត្ដតាកែវ ស្លាប់នៅកន្លែងកើត ហេតុ និង២នាក់ទៀតឈ្មោះពេជ្រ គង្គា និងឈ្មោះទូច អាយុ១៨ឆ្នាំដូចគ្នា មាន ស្រុកកំណើតឃុំអង្គតាសោម ស្រុកត្រាំកក់ ខេត្ដតាកែវ បច្ចុប្បន្នស្ថិតនៅក្នុង មន្ទីរពេទ្យកាល់ម៉ែត៕ ហេង នាង
