យុវជនម្នាក់ស្រវឹងជិះម៉ូតូទៅបុករ៉ឺម៉កម៉ូតូដឹកបន្លែបណ្តាលឲ្យសន្លប់
ភ្នំពេញ៖ កាលពីវេលាម៉ោង៣និង១០នាទីទៀបភ្លឺ ថ្ងៃទី១៥ កុម្ភៈ យុវជនម្នាក់ស្រវឹងស្រា ជិះម៉ូតូទៅបុកជាមួយរ៉ឺម៉កម៉ូតូដឹកបន្លែ ដែលបើកបរបញ្ច្រាសទិសគ្នា តាមមហាវិថីព្រះមុនីរ៉េត ម្តុំលក់បន្លែតាមចិញ្ចើមផ្លូវជិតផ្សារដើមគ ក្នុងសង្កាត់ផ្សារដើមគ ខណ្ឌទួលគោក បណ្តាលឲ្យម៉ូតូខ្ទេចមួយកំណាត់ខាងមុខ សន្លប់ រីឯរ៉ឺម៉កដឹកបន្លែរត់គេចបាត់។
ប្រភពព័ត៌មានបានឲ្យដឹងថា យុវជនម្នាក់ស្រវឹងស្រាជិះម៉ូតូ គុបមូល (តឿ) ពណ៌ទឹកដោះគោ។ យុវជននោះបើកតាមមហាវិថីព្រះមុនីរ៉េត ពីជើងទៅត្បូង ចំណែករ៉ឺម៉កម៉ូតូដឹកបន្លែជិះលើផ្លូវបញ្ច្រាសទិសដៅចរាចរណ៍ពីត្បូង ទៅជើង ខណៈមកដល់ចំណុចកើតហេតុខាងលើ ដោយសារជិះលឿនទៅបុករ៉ឺម៉កម៉ូតូដឹកបន្លែចំពីមុខពេញទំហឹង បណ្តាលឲ្យអ្នកបើកម៉ូតូសន្លប់ឈឹង។ ឯម៉ូតូខូចខាតមួយកំណាត់ខាងមុខ ចំណែករ៉ឺម៉កម៉ូតូដឹកបន្លែបើករត់គេចទៅបាត់។
ក្រោយពេលកើតហេតុ ជនរងគ្រោះត្រូវរថយន្តសង្គ្រោះដឹកយកទៅព្យាបាលនៅគ្លីនិកឯកជន។ ចំណែកម៉ូតូត្រូវប៉ូលិសយកទៅរក្សាទុកនៅខណ្ឌទួលគោក៕ ហេង នាង
