បើករថយន្តគេចពីរថយន្តមួយគ្រឿងទៀតជ្រុលទៅបុករបាំងថ្មពុះចែកទ្រូងផ្លូវ
ភ្នំពេញ៖ កាលពីវេលាម៉ោង៨ និង៥០នាទីយប់ថ្ងៃទី ១៣ ខែកុម្ភៈ បុរសម្នាក់បើករថយន្តចេញពីកម្មវិធីជប់លៀង ស្រាប់តែមានរថយន្តមួយគ្រឿងទៀតបើកមកពីក្រោយ ក៏ងៀកបន្តិចខ្លាចប៉ះគ្នា ដោយមិនបានគិតថានៅពីមុខមានរបាំងថ្មពុះចែកទ្រូងផ្លូវ ក៏បុកចំពីមុខពេញទំហឹង ស្ថិតត្រង់ចំនុចមុខសាកលវិទ្យាល័យអាយ អាយ ស៊ី ក្នុងសង្កាត់ចង្រែក្រោម ខណ្ឌមានជ័យ។
ប្រជាពលរដ្ឋនៅកន្លែងកើត ហេតុឲ្យដឹងថា មុនពេលកើតហេតុ គឺឃើញមានរថយន្តម៉ាកកាមរី បាឡែនពណ៌ស្ពាក់ស្លាកលេខភ្នំពេញ 2U-6140 បើកបរដោយឈ្មោះ វុទី្ធ ភេទប្រុស អាយុប្រមាណជាង៤០ឆ្នាំ មានមុខងារជាមន្រី្តកងរាជអាវុធហត្ថខេត្តកណ្តាល ជិះម្នាក់ឯង បើករថយន្តក្នុងទិសដៅពីត្បូងមកជើង តាមបណ្តោយផ្លូវជាតិលេខ២ លុះមកចំនុចមុខសាកលវិទ្យាល័យអាយ អាយ ស៊ី ខណៈពេលនោះមានរថយន្តមួយគ្រឿងទៀតមិនស្គាល់អត្តសញ្ញាណ បានបើកយ៉ាងលឿនមកពីក្រោយ នៅពេលបុរសជាម្ចាស់រថយន្តកាមរី បាឡែន បានទាញចង្កូតងៀកមកខាងឆ្វេង នៃផ្លូវដោយមិនបានគិតថានៅត្រង់ចំនុចនេះ មានរបាំងថ្មពុះចែកទ្រូងផ្លូវ ក៏បុកចំពីមុខពេញទំហឹង បណ្តាលឲ្យរថយន្តរងការខូចខាតមួយចំនួនធំ ចំណែករថយន្តមួយទៀតបានបើករត់បាត់ ៕ ហេង នាង
