ការដុតសម្លាប់ខ្លួនដើម្បីបរិហារក្រុងប៉េកាំងចូលដល់ចំនួនរយនាក់
ការិយាល័យសម្តេចសង្ឃដាឡៃឡាម៉ា បានបញ្ជាក់អំពីព័ត៌មាននៃការប៉ុនប៉ងដុតសម្លាប់ខ្លួនរបស់ជនទីបេ នៅថ្ងៃពុធទី ១៣កុម្ភៈឆ្នាំ២០១៣ នៅទីក្រុងកាត់មង់ឌូ ប្រទេសនេប៉ាល់។ នេះជាករណី ទី១០០នាក់គត់ គិតចាប់តាំងពីឆ្នាំ២០០៩មក ដែលបណ្តាជនទីបេ ទាំងសង្ឃ ទាំងប្រថុជ្ជន បានជ្រើសរើសការដុតសម្លាប់ខ្លួន ដើម្បីបរិហារការរបបក្រុងប៉េកាំងដែលគ្រប់គ្រងផ្តាច់ការ និងបំបិទសេរីភាពវប្បធម៌ និងសាសនានៅតំបន់ស្វយ័តទីបេ។
មាន អាយុទើបតែជាង២០ឆ្នាំបន្តិច យុវជនទីបេ បានយកប្រេងសាំង មកស្រោចពីលើសម្លៀកបំពាក់ មុននឹងបញ្ចេះឱ្យក្លាយជាភ្លើងឆេះរោលដុតសម្លាប់ខ្លួន ។ ហេតុការណ៍នេះ ប្រព្រឹត្តទៅ នៅក្នុងមណ្ឌលស្វែងធម៌ពុទ្ធសាសនាដ៏ល្បីល្បាញមួយនៅលើពិភពលោក គឺចេតីយ៍ Boudhanath នាក្រុងកាត់ម៉ង់ឌូ ប្រទេសនេប៉ាល់ និងនៅចំពោះមុខភ្ញៀវទេសចរដែលកំពុងទទួលទានអាហារពេលព្រឹក ក្នុងភោជ្ជនីដ្ឋានរបស់វត្ត និងដែលជាអ្នកស្រែកហៅរកជំនួយ សង្គ្រោះ។ ប៉ូលិសបានពន្លត់ភ្លើង និងនាំជនទីបេរូបទៅមន្ទីរពេទ្យ តែស្ថាន ភាពរបួសមានលក្ខណៈធ្ងន់ធ្ងរណាស់។
តំណាង រដ្ឋាភិបាលទីបេនិរទេស លោក Tempa Tsering បានបញ្ជាក់ព័ត៌មាននេះភ្លាមមកកាន់ទីភ្នាក់ងារព័ត៌មានបារាំង ថាការប៉ុនប៉ងដុតសម្លាប់របស់ជនជាតិទីបេនៅថ្ងៃពុធនេះ ជាករណីទី១០០ ក្នុងនោះមាន៨៣នាក់បានស្លាប់ និងបានអំពាវ នាវឱ្យជនទីបេទាំងអស់បញ្ឈប់សកម្មភាពដុតសម្លាប់ខ្លួន ព្រោះជាទង្វើដ៏ខ្លោចផ្សារខ្លាំងណាស់។
សូមបញ្ជាក់ថាក្រោយបដិវត្តបះបោរត្រូវបង្ក្រាបនៅឆ្នាំ១៩៥៩ សម្តេចសង្ឃដាឡៃឡាម៉ា បានរត់ភៀសខ្លួនទៅជ្រកកោននៅឥណ្ឌាមក តំបន់ស្វយ័តទីបេស្ថិតក្រោមការត្រួតត្រាយ៉ាងតឹងរ៉ឹងពីសំណាក់ ក្រុងប៉េកាំង។ ការបាត់សេរីភាព សាសនា និងការរីករាលនៃវត្តមានជនជាតិហានលើទឹកដីទីបេ ភាពអស់សង្ឃឹមនេះបានជំរុញឱ្យសង្ឃ និងជនទីបេមួយចំនួនជ្រើសរើសធ្វើការតវ៉ា ដោយការដុតសម្លាប់ខ្លួន។
គិតតាំងពីឆ្នាំ២០០៩មក ករណីដុតសម្លាប់ខ្លួន មានកើតតែច្រើន ទាំងនៅក្នុងទឹកដីស្វយ័តទីបេ និងទាំងនៅប្រទេសឥណ្ឌា ឬនេប៉ាល់។ ប៉ុន្តែក្រុងប៉េកាំងបានច្រានចោលការចោទប្រកាន់ទាំងអស់នោះ ដោយអះអាងថាជនជាតិទីបេ មានសេរីភាពសាសនាគ្រប់គ្រាន់ រដ្ឋាភិបាលបានខិតខំអភិវឌ្ឍ និងវិនិយោគ ដើម្បីទីបេកាន់តែទំនើប និងមានជីវិតរស់នៅប្រសើរខ្ពស់ជាងមុន៕ដោយ អៀង សុខម៉ិញ (RFI)