បាតុកម្មនៅតំបន់Cachemireឥណ្ឌា ក្រោយពេលសកម្មជនCachemire ម្នាក់ត្រូវព្យួរក
បាតុកម្ម ដ៏ពុះពោរដោយកំហឹង ចំនួនបួន បានកើតឡើង នៅតំបន់ Cachemire ប្រទេសឥណ្ឌា កាលពីថ្ងៃសៅរ៍ម្សិលមិញ ក្រោយពីសកម្មជន Cachemire ម្នាក់ត្រូវព្យួរក។ ការប្រឈមមុខរវាងក្រុមបាតុករ និងប៉ូលិសបានបង្កអោយមានមនុស្ស ៣៦ នាក់រងរបួស ក្នុងនោះមានប៉ូលិស ២៣នាក់។ សកម្មជន Cachemire ដែលត្រូវបានគេព្យួរក ឈ្មោះ Mohammad Afzal Guru ត្រូវបានតុលាការដាក់ទោសប្រហារជីវិត ពីបទបានរៀបចំផែនការភេរវកម្មប្រឆាំងសភាឥណ្ឌា កាលពីខែធ្នូ ឆ្នាំ២០០១ ធ្វើអោយមនុស្ស៩នាក់ បាត់បង់ជីវិត។ អ្នកសង្កេតការណ៍នានាយល់ថា ការព្យួរកសកម្មជនរូបនេះ គឺបង្ហាញច្បាស់ពីលទ្ធផលនៃយុទ្ធសាស្ត្រនយោបាយ របស់គណបក្សសមាជដែលកំពុងកាន់អំណាចនៅសភាឥណ្ឌា សំរាប់ការបោះឆ្នោតសភា នៅឆ្នាំ ២០១៤ ខាងមុខនេះ។
បាតុកម្ម នានាដែលបានកើតឡើង នៅតំបន់Cachemire ក្នុងប្រទេសឥណ្ឌា កាលពីថ្ងៃសៅរ៍ម្សិលមិញនេះ បានប្រែក្លាយទៅជាអំពើហិង្សា ហើយការប្រឈមមុខរវាងក្រុមបាតុករ និងប៉ូលិស បានបង្កអោយមនុស្ស ៣៦ នាក់រងរបួស ក្នុងនោះមានប៉ូលិស ២៣នាក់។
ក្រុមបាតុករមានការខឹងសម្បារ ចំពោះការប្រហារជីវិតដោយព្យួរកសកម្មជន Mohammad Afzal Guru មានប្រភពមកពីតំបន់ Cachemire ឥណ្ឌា។ Afzal Guru ត្រូវបានតុលាការដាក់ទោសប្រហារជីវិត ពីបទរៀបចំផែនការភេរវកម្មប្រឆាំងសភាឥណ្ឌា កាលពីខែធ្នូ ឆ្នាំ២០០១។ ភេរវកម្មនេះបានបង្កអោយមានស្លាប់មនុស្ស៩នាក់។ ប្រធានាធិបតីឥណ្ឌា បានបដិសេធសំណើសុំលើកលែងទោសលើកចុងក្រោយ របស់សកម្មជនរូបនេះ។ Afzal Guru ត្រូវបានគេព្យូរកយ៉ាងសំងាត់ នៅពេលថ្ងៃសៅរ៍ព្រឹកព្រលឹម។
នៅក្រុងញូវដេល្លី គេឃើញមានជម្លោះប្រឈមមុខគ្នា រវាងសកម្មជនសាសនាហ៊ីនឌូ និងបាតុករនានាដែលបានមកផ្តុំគ្នានៅកន្លែងមួយក្នុងទីប្រជុំ ជន ដើម្បីតវ៉ាប្រឆាំងនឹងការព្យួរកនេះ។ នៅឯតំបន់Cachemire ក្នុងប្រទេស ប៉ាគីស្ថានជិតខាងឯណោះវិញ បាតុករ ២៥០នាក់ ក៏បានចុះធ្វើបាតុកម្មប្រឆាំងនឹងការព្យួរកសកម្មជន Cachemire នេះផងដែរ។
ដើម្បីចៀសវៀងភាពវឹកវរខ្លាំងបង្កដោយបាតុកម្មទាំងនេះ អាជ្ញាធរបានដាក់បំរាមគោចរណ៍ នៅតាមទីកន្លែងនានា ក្នុងតំបន់ Cachemire ហើយរដ្ឋអំណាចក្នុងរដ្ឋ Jammu និង Cachemire ស្ថិតនៅភាគខាងជើងឥណ្ឌា បានអំពាវនាវអោយមានការស្ងប់ស្ងាត់។
សភាឥណ្ឌាគិតថា ការព្យួរកនេះគឺបានផ្តល់យុត្តិធម៌ដល់ជនរងគ្រោះ ក្នុងអំពើភេរវកម្ម នាឆ្នាំ ២០០១ ហើយយុត្តិសាស្ត្រត្រូវបានគេគោរពយ៉ាងពេញលេញ។ គណបក្សកាន់អំណាចបានបដិសេធ នូវរាល់ទស្សនៈដែលថាការប្រហារជីវិតសកម្មជនរូបនេះ ធ្វើឡើងដើម្បីទទួលប្រយោជន៍នយោបាយ។
ផ្ទុយទៅវិញ នៅពេលដែលឥណ្ឌាកំពុងត្រៀមរៀបចំការបោះឆ្នោតសភា សំរាប់ឆ្នាំ ២០១៤ខាងមុខនេះ អ្នកវិភាគនានាយល់ថា ការព្យួរកនេះ គឺជាយុទ្ធ សាស្ត្រនយោបាយរបស់គណបក្សសមាជ ដែលកំពុងកាន់អំណាច នៅសភាឥណ្ឌា។ ជាមួយនឹងយុទ្ធសាស្ត្រនេះ គណបក្សកណ្តាលឆ្វេងនិយម បានទទួលពិន្ទុខ្ពស់ក្នុងវិស័យសន្តិសុខ។ វិស័យសន្តិសុខដែលគេគិតថា ជាឯកទេសជំនាញរបស់គណបក្សប្រឆាំងឯណោះទៅវិញទេ។
ក្នុងរយៈពេលជាប់គុក ១២ឆ្នាំ របស់សកម្មជន Guru មុននឹងមានការប្រហារជីវិតនៅថ្ងៃសៅរ៍នេះ គណបក្សស្តាំជាតិនិយមសាសនាហ៊ីនឌូ ដែលជាគណបក្សប្រឆាំង បានចោទរដ្ឋាភិបាលឥណ្ឌា ថាឆ្លៀតឧកាសចំណេញផលប្រយោជន៍នយោបាយ ពីសំណុំរឿងនេះ ដើម្បីបង្ហាញពីករុណាធម៌របស់សភា។ គណបក្សប្រឆាំងតែងតែចោទសភាថា ខ្លាចមិនចង់ដាក់សម្ពាធដល់អ្នកបោះឆ្នោតសាសនាអ៊ីស្លាម៕ដោយ ព្រំ សឿន សូលីណា (RFI)
