រថយន្ដក្រុមហ៊ុនផែស្ងួត សូ ងួនបុកម៉ូតូរបួស ៣នាក់
ភ្នំពេញ ៖កាលពីវេលាម៉ោង៥និង៤០ នាទីល្ងាច ថ្ងៃទី១០ ខែកុម្ភៈ រថយន្ដកុងតឺន័រមួយគ្រឿង ពេលកំពុងបើកបរលឿនបានរេចង្កូតជ្រុល ទៅបុកអ្នកជិះម៉ូតូ១គ្រឿងមានគ្នា៣នាក់ បណ្ដាលឱ្យរងរបួសធ្ងន់ម្នាក់និងស្រាល ២នាក់ នៅតាមបណ្ដោយផ្លូវជាតិលេខ៤ ត្រង់ ភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះដែលរងរបួសធ្ងន់ឈ្មោះ ខែត រ៉េត ភេទស្រី អាយុ៣២ឆ្នាំ ជាកម្ម ការិនីរោងចក្រកាត់ដេរ មានទីលំនៅ ភូមិទូលស្មៀន ឃុំផុង ស្រុកបសេដ្ឋ ខេត្ដកំពងស្ពឺ ។ ចំណែកអ្នករបួសស្រាល ២នាក់ ម្នាក់ឈ្មោះ ដូ ភេទប្រុស អាយុ៤០ ឆ្នាំ ត្រូវជាប្ដីស្ដ្រីរងគ្រោះខាងលើ ជាអ្នក បើកម៉ូតូម៉ាកហុងដាសេ១២៥ ស៊េរីឆ្នាំ២០១០ ពណ៌ខ្មៅ ពាក់ស្លាកលេខ កំពត 1D-3751 និងស្ដ្រីម្នាក់ឈ្មោះ ខែត សុភាព អាយុ១៨ឆ្នាំ ត្រូវជាប្អូនស្រីស្ដ្រី រងគ្រោះ រងរបួសស្រាល ។
តាមប្រភពព័ត៌មាននៅកន្លែងកើត ហេតុបានឱ្យដឹងថា មុនពេលមានគ្រោះថ្នាក់ គេឃើញរថយន្ដបង្កហេតុនិងម៉ូតូរងគ្រោះ បានបើកបញ្ច្រាសទិសគ្នា ដែលរថយន្ដ បើកក្នុងទិសដៅពីលិចទៅកើតក្នុង ល្បឿនយ៉ាងលឿន ចំណែកម៉ូតូរងគ្រោះ ដែលជិះគ្នា៣នាក់បានបើកក្នុងទិសដៅ ពីកើតទៅលិច ។ លុះទៅដល់កន្លែងកើត ហេតុ គេឃើញរថយន្ដបង្កហេតុមិនដឹង ជាមូលហេតុអ្វីក៏ស្រាប់តែរេចង្កូតទៅបុក ម៉ូតូយ៉ាងពេញទំហឹងតែម្ដង ធ្វើឱ្យជនរង គ្រោះទាំង៣នាក់រងរបួសធ្ងន់និងស្រាល ចំណែកម៉ូតូបានជាប់នៅខាងក្រោម រថយន្ដនិងត្រូវរថយន្ដនោះអូសទៅធ្លាក់ ប្រឡាយទឹកស្អុយតាមបណ្ដោយផ្លូវ ថែមទៀតផង ។
ក្រោយពេលកើតហេតុ អ្នកបើកបររថយន្ដ បង្កហេតុក៏បានចុះពីលើរថយន្ដរត់គេចខ្លួនបាត់ ដោយទុកតែរថយន្ដចោល នៅកន្លែងកើតហេតុ ។ ដោយឡែកជន រងគ្រោះត្រូវបានគេបញ្ជូនទៅសង្គ្រោះ នៅមន្ទីរពេទ្យ ៕ ហេង នាង
