រយៈពេល ១ម៉ោងកន្លះមានអំពើប្លន់ប្រដាប់អាវុធ ២ករណី
ភ្នំពេញ៖ សុខ កាលពីវេលាចន្លោះម៉ោង ២២និងម៉ោង២៣: ៣០នាទី យប់ ថ្ងៃទី០៦ ខែកុម្ភៈ ឆ្នាំ២០១៣ វេលាម៉ោង២២និង០០នាទីយប់ មានអំពើប្លន់ប្រដាប់អាវុធយកម៉ូតូ២ករណីបានកើតឡើងផ្ទួនៗគ្នា នៅក្នុងភូមិ២នៃសង្កាត់ទឹកថ្លា ខណ្ឌសែន នៅចំណុចភូមិត្រពាំងឈូក សង្កាត់ទឹកថ្លា។
ក្រុមជនប្រដាប់អាវុធមានគ្នា៤នាក់ ជិះម៉ូតូ២គ្រឿង ម៉ាកស្កូបពីទំនើបៗដូចគ្នា បានធ្វើសកម្មភាពភ្ជង់និងបាញ់គំរាមយកម៉ូតូម៉ាក សេ១២៥ ពណ៌ខ្មៅ ពាក់ស្លាកលេខភ្នំពេញ 1BG-6872 ពីម្ចាស់ម៉ូតូឈ្មោះ ចំរើន សំណាង អាយុ២២ឆ្នាំ មានទីលំនៅផ្ទះជួលជិតកន្លែងកើតហេតុ ខណៈពេលដែលជនរងគ្រោះជិះម៉ូតូដឹកប្រពន្ធចេញពីធ្វើការរោចក្រមកដល់ មុខលំនៅឋាន។
រីឯហេតុការណ៍ទី២បានកើតឡើងកាលពីវេលាម៉ោង ២៣និង៣០នាទីយប់ នៅចំណុចផ្លូវបេតុង ក្រុមទី៥ ភូមិផ្សារទឹកថ្លា សង្កាត់ទឹកថ្លា ដែលក្រុមជនល្មើសមានគ្នា៣នាក់ ជិះម៉ូតូមួយគ្រឿងមិនស្គាល់ម៉ាក បានជិះអែមទន្ទឹមម៉ូតូនារីរងគ្រោះឈ្មោះ សយ សុដាវី ភេទស្រី អាយុ២៤ឆ្នាំ មុខរបរជាអ្នករត់តុ ស្នាក់នៅចំណុចកើតហេតុខាងលើ រួចហើយយកមួកសុវត្ថិភាពវាយក្បាលនារីរងគ្រោះប្លន់យកម៉ូតូម៉ាក ស្មាស ពណ៌ស្លាទុំ ពាក់ស្លាកលេខកណ្ដាល 1L-1676 យកទៅបាត់ដោយសុវត្ថិភាព៕
ដោយ៖ ហេង នាង
