រថយន្ត ៣គ្រឿងបើកបុកបន្តកន្ទុយគ្នា
ភ្នំពេញ៖ កាលពីវេលាម៉ោង ១០និង៣០នាទីព្រឹក ថ្ងៃទី០៧ ខែកុម្ភៈ ឆ្នាំ២០១៣រថយន្តTRITON ទៅបុកគូទរថយន្តម៉ាកកាមរីឆ្លាម ហើយក៏ជ្រុលល្បឿនទៅបុករថយន្តកូរ៉េ១តោនកន្លះ ស្ថិតក្នុងសង្កាត់ផ្សារដេប៉ូទី៣ ខណ្ឌទួលគោក។
តាមប្រភពពត៌មានពីកន្លែងកើតហេតុបានឲ្យដឹងថា មុនពេលកើតហេតុរថយន្ត TRITON ពណ៌ប្រផេះ ពាក់ស្លាកលេខភ្នំពេញ 2R-2985 បើកបរដោយបុរសចំណាស់ម្នាក់ធ្វើដំណើរតាមបណ្ដោយផ្លូវ មហាវិថីសហព័ន្ធរស្ស៊ី ក្នុងទិសដៅពីលិចទៅកើត លុះមកដល់ចំណុចកើតហេតុខាងលើ បានជ្រុលល្បឿនទៅបុកគូទរថយន្តមួយគ្រឿងម៉ាក កាមរីឆ្លាម ពណ៌ស្ករ ពាក់ស្លាកលេខភ្នំពេញ 2H-5637 បើកបរដោយស្ត្រីមានផ្ទៃពោះម្នាក់ ខណៈពេលនោះរថយន្ត កាមរីឆ្លាមបានជ្រុលល្បឿនទៅបុករថយន្តកូរ៉េមួយតោនកន្លះមួយគ្រឿង ថែមទៀត ពណ៌ស ពាក់ស្លាកលេខភ្នំពេញ 2F-5146 ជិះគ្នាបីនាក់ ក្នុងទិសដៅស្របទិសគ្នាជាមួយរថយន្ត TRITON និងរថយន្តកាមរីឆ្លាម បណ្ដាលឲ្យរងការខូចខាតយ៉ាងដំណំដូចគ្នា។
ក្រោយពេលកើតហេតុ រថយន្តទាំងបីគ្រឿង ត្រូវបានសមត្ថកិច្ចមូលដ្ឋាន ចុះធ្វើការវាស់វែងដកហូតយកទៅរក្សាទុកនៅអធិការដ្ឋាននគរបាលខណ្ឌ ទួលគោក ដើម្បីចាត់ការតាមផ្លូវច្បាប់៕
ដោយ៖ ហេង នាង
