ងងុយដេកបើករថយន្ដបុកបង្គោលភ្លើងបំភ្លឺ ផ្លូវបាក់អស់មួយដើម
ភ្នំពេញ ៖ កាលពីវេលាម៉ោង២ និង៣០នាទី យប់រំលងអាធ្រាត្រចូលថ្ងៃទី០៧ ខែកុម្ភៈ ឆ្នាំ២០១៣ អ្នក បើករថយន្ដកាមរីឆ្លាម ពណ៌ត្រីឆ្លូញ ពាក់ស្លាកលេខភ្នំពេញ 2K-9565 បុកបង្គោលភ្លើង បំភ្លឺបាក់អស់ចំនួន មួយដើម ស្ថិតនៅតាមបណ្ដោយផ្លូវជាតិ លេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ។
យោងតាមប្រភពព័ត៌មានពីសមត្ថកិច្ច បានឱ្យដឹងថា មុនពេលកើតហេតុ អ្នកបើករថយន្ដកាមរីឆ្លាម ឈ្មោះវុធ អេងហុង អាយុ២០ឆ្នាំ បានធ្វើដំណើរតាម បណ្ដោយ ផ្លូវជាតិលេខ២ លុះដល់ចំណុចកើតហេតុ ដោយសារតែងោកមួយភាំង ក៏បុកម៉ូតូសង់កូរ៉េ ដែលចតចោល នៅតាមចិញ្ចើមផ្លូវ រួចបន្ដជ្រុលទៅបុកបង្គោលភ្លើងបំភ្លឺផ្លូវ បាក់អស់ចំនួនមួយដើម ។
ក្រោយកើតហេតុរថយន្ដបង្ក ត្រូវបានសមត្ថកិច្ចឃាត់ទុក ដើម្បីចាត់ការទៅតាមផ្លូវច្បាប់។
ដោយ៖ ហេង នាង
